काठमाडौं । चलचित्र ‘कार्साङ’को गीत ‘सात भन्ज्याङ’ सार्वजनिक भएको छ । गीतमा डीपी खनालको शब्द छ भने एसडी योगीको संगीत छ । स्वर एडी योगी र रेश्मा पुन मगरको छ । 

गीतको भिडियोमा चलचित्रका मुख्य कलाकार दयाहाङ राई र सिर्जना निङलेखुको अभिनय छ । गीतमा दयाहाङ र सिर्जनाको प्रेम देखाइएको छ । 

पूर्वी नेपालको शेर्पा समुदाय र राई समुदायको संस्कृति र जीवनशैलीलाई गीतको शब्द र भिडियोले समेटेको छ । 

पुस २६ गते रिलिज हुने चलचित्रलाई यम शेर्पाले निर्देशन गरेका छन् । चलचित्रले अभाव, गरिबी र शेर्पा समुदायको सांस्कृतिक कथावस्तुलाई प्रस्तुत गर्नेछ ।

‘कार्साङ’मा दयाहाङ र सिर्जनासँगै जितु नेपाल, दीया मास्के, बुद्धि तामाङ, सृष्टि गौतम, डोमा ह्योल्मो, प्रेम लोप्चन र सुरवीर पण्डितलगायतका कलाकारको अभिनय रहेको छ । 

यार्सा फिल्म्स र पुरुषोत्तम प्रधान फिल्मसको प्रस्तुतिमा बनेको यो चलचित्रका निर्माता तथा छायांकार पुरुषोत्तम प्रधान हुन् । सह–निर्मातामा गोविन्द बोहरा छन् । कार्यकारी निर्माताको रूपमा आङछिरिङ शेर्पा छन् ।