काठमाडौं । निजामती कर्मचारीका पार्टीगत ट्रेड युनियन हटाउन सत्तारूढ दुई दल कांग्रेस र नेकपा (एमाले) सहमत भएका छन् । बिहीबार राज्यव्यवस्था तथा सुशासन समितिको बैठकमा संघीय निजामती सेवा विधेयकमाथिको छलफलमा कर्मचारीका ट्रेड युनियनबारे दुई दलका प्रमुख सचेतकले समान धारणा राखेका हुन् ।

विधेयकका सम्बन्धमा पार्टीका प्रमुख सचेतक तथा सचेतकहरूसँगको छलफलमा बोल्ल्दै नेपाली कांग्रेसका प्रमुख सचेतक श्याम घिमिरेले कर्मचारीहरूलाई दलगत ट्रेड युनियन खोल्न दिन नहुने बताए । उनले कानुनमा समेत सरकारी संस्थामा आवद्ध व्यक्तिले कुनै पनि पार्टीको सदस्यता लिन नपाउने व्यवस्था गरेको उल्लेख गरे । निजामती कर्मचारीका लागि एउटा मात्र ट्रेड युनियन राख्नुपर्ने र अधिकृतभन्दा माथिल्लो दर्जाका कर्मचारीले त्यसको सदस्यता लिन नपाउने व्यवस्था गर्नुपर्ने उनको भनाइ थियो ।

उनले भने, "यो पार्टीगत ट्रेड युनियन त खोल्न दिनै हुँदैन । नेपालको कानुनले पनि सरकारी पेरोलमा रहेकाहरूले कुनै पनि पार्टीको सदस्यता लिन पाइँदैन भनेर व्याख्या गरेको छ । त्यसैले हामीले यो ट्रेड युनियनहरू हामीले चाहिँ बोर्ड जम्मै झुन्ड्याएर घर बनाइदिएर राखेका छौँ । यो सबै पार्टीले गरेका छौँ । यो पार्टीकै धारणा हो ।"

बैठकमा बोल्दै नेकपा (एमाले)का प्रमुख सचेतक महेश बर्तौलाले कर्मचारीको ट्रेड युनियनलाई व्यवस्थित बनाउन जरुरी रहेको बताए । उनले कर्मचारीमा पेसागत प्रवर्द्धनको हितसँग जोडिएका कुराहरूमा बन्देज लगाउन उपयुक्त नभए पनि ट्रेड युनियनहरू राजनीतिक क्रियाकलापमा संलग्न हुने गरेको बताए ।

कर्मचारीको लागि एक मात्र ट्रेड युनियन राख्नुपर्ने धारणा राखे । राज्यको नीतिगत निर्णयमा सहभागी हुने कर्मचारीले कुनै पनि ट्रेड युनियनको सदस्यता लिन नपाउने व्यवस्था गर्नुपर्नेमा जोड दिए ।