काठमाडौं । नेपाल प्रिमियर लिग (एनपीएल)को फाइनलमा सुदूरपश्चिम रोयल्सविरुद्ध खेल्नुअघि जनकपुर बोल्ट्सका कप्तान आसिफ शेखले बदलाको मानसिकता नरहेको बताएका छन् ।

प्रतियोगिताको फाइनलमा शनिबार जनकपुरले सुदूरपश्चिमविरुद्ध प्रतिस्पर्धा गर्दै छ । यसअघि यी दुई टिमबीच भएको दुई खेलमा सुदूरपश्चिमले सहज जित निकालेको थियो । लिग चरणको खेलमा सुदूरपश्चिमले जनकपुरविरुद्ध ७२ रनको र पहिलो क्वालिफायरमा आठ विकेटको जित निकालेको थियो । 

तर, दोस्रो क्वालिफायरमा कर्णाली याक्सविरुद्ध दुई विकेटको जित निकाल्दै फाइनल यात्रा तय गरेको थियो । फाइनलअघि जनकपुरका कप्तानसमेत रहेका आसिफले सुदूरपश्चिमविरुद्ध स्तरीय क्रिकेट खेल्ने प्रतिक्रिया दिए ।

“अहिलेसम्म खेलहरू राम्रो भएको छ । फरक–फरक विकेटमा खेलिरहेका छौँ । कति खेल हाइस्कोरिङ भयो, कति खेल लो स्कोरिङ पनि भए । दुवै अवस्थालाई सदुपयोग गरेर खेल्ने प्रयास गरेका छौँ । सबै खेलाडी राम्रो अवस्थामा हुनुहुन्छ । अब एक खेल बाँकी छ, त्यसलाई राम्रो नोटमा फिनिस गर्नेछौँ,” आसिफले भने, “बदला लिने मानसिकता छैन । भोलि स्तरीय क्रिकेट खेल्छौँ । हामीले सक्दो दिनेछौँ । नतिजाको बारेमा धेरै सोचेका छैनौँ । मैदानबाट निस्किँदा आफूले सक्दो दियौँ भन्ने महसुस हुनुपर्‍यो ।”

कीर्तिपुरस्थित त्रिवि क्रिकेट मैदानमा हुने उपाधि भिडन्त शनिबार मध्याह्न १२ः१५ बजेदेखि सुरु हुनेछ ।

हेर्नुहोस् भिडियो