काठमाडौं । बसिर अहमेदको अलराउन्ड प्रदर्शनप्रेरित विराटनगर किंग्सले नेपाल प्रिमियर लिग (एनपीएल)मा चितवन राइनोजविरुद्ध ५१ रनको जित निकालेको छ ।

शुक्रबार कीर्तिपुरस्थित त्रिवि क्रिकेट मैदानमा विराटनगरले प्रस्तुत गरेको १८२ रनको लक्ष्य पछ्याउने क्रममा चितवनले निर्धारित २० ओभरमा ६ विकेट गुमाएर १३० रन मात्र बनाउन सक्यो । प्रतियोगितामा विराटनगरको यो दोस्रो जित हो । विराटनगरले आफ्नो पहिलो खेलमा जनकपुर बोल्ट्ससँग आठ विकेटको हार व्यहोरेको थियो । दोस्रो खेलमा सुदूरपश्चिम रोयल्सविरुद्ध ९० रनले पराजित भएको विराटनगरले तेस्रो खेलमा लुम्बिनी लायन्सविरुद्ध दुई विकेटको जित निकालेको थियो ।

चौथो खेलमा पुनः पराजय भोगेको विराटनगरलाई कर्णाली याक्सले सात रनले निराश बनाएको थियो । पाँचौँ खेलमा विराटनगरले पोखरा एभेन्जर्ससँग सुपर ओभरमा १३ रनको हार व्यहोरेको थियो ।

चितवनका अमर रौटेलाले सर्वाधिक ४२ रन बनाए । उनले २९ बलमा तीन चौका र दुई छक्का प्रहार गरे । ओपनर सन्तोष कार्कीले २५ बलमा तीन चौका र एक छक्कासहित २८ रन बनाए । कप्तान कुशल मल्लले २५ रन थपे । उनले २५ बलमा दुई चौका र एक छक्का प्रहार गरे । 

रवि बोपाराले २४ बल खेल्दा दुई चौका प्रहार गर्दै २० रन जोडे । हसन एसाखिलले पाँच रन जोड्दा बसिल हमेद एक रनमै पभेलियन फर्किए । विराटनगरका कप्तान सन्दीप लामिछानेले दुई विकेट लिए । चार ओभर बलिङ गरेका सन्दीपले २८ रन खर्चिए । जारी प्रतियोगितामा सन्दीपको यो सबैभन्दा राम्रो स्पेल हो ।

क्रिस सोल, बसिर अहमेद र सुवास भण्डारीले समान एक विकेट लिए । चार ओभर बलिङ गरेका बसिरले एक मेडन फ्याक्दै १९ रन खर्चिए । त्यसअघि टस जितेर ब्याटिङमा आएको विराटनगरले निर्धारित २० ओभरमा पाँच विकेट गुमाएर १८१ रनको योगफल खडा गरेको थियो ।

विराटनगरका बसिर अहमेदले सर्वाधिक ६८ रन बनाए । उनले ४४ बलमा चार चौका र चार छक्का प्रहार गरे । ३३–४ को स्थितिबाट बसिरले ओपनर मार्टिन गप्टिलसँग ६५ रनको साझेदारी गर्दै विराटनगरको इनिङ सम्हालेका थिए । अर्धशतक बनाउन पाँच रनले चुकेका गप्टिलले ३५ बलमा एक चौका र चार छक्का प्रहार गरे । गप्टिललाई १४औँ ओभरको पाँचौ बलमा चितवनका कप्तान कुशल मल्लले बोल्ड गरेका थिए ।

बसिरले ९८–५ को स्थितीबाट पाँचौँ विकेटका निम्ति राजेश पुलामी मगरसँग ८३ रनको साझेदारी गर्दै विराटनगरलाई १५० रन पार गराएका थिए । राजेश पुलामी मगरले अविजित ३३ रन थपे । राजेशले २० बलमा एक चौका र तीन छक्का प्रहार गरे । 

विराटनगरका ओपनर लोकेश बम र स्कट एड्वार्ड्स ‘डक’ भए । दीपक बोहराले पनि चार रनमात्र थप्न सके । निकोलस किर्टोनले आठ रन जोडे । चितवनका रिजन ढकालले दुई विकेट लिए । चार ओभर बलिङ गरेका रिजनले ४० रन खर्चिए । सोहेल तान्विर, बसिर अमिद र कुशल मल्लले समान एक विकेट हात पारे । 

प्रतियोगितामा चितवनको भने यो तेस्रो हार हो । चितवनले प्रतियोगिताको पहिलो खेलमा काठमाडौं गुर्खाजविरुद्ध पाँच विकेटको जित निकालेको थियो । दोस्रो खेलमा पोखरा एभेन्जर्सविरुद्ध ८७ रनको जित निकालेको चितवनले तेस्रो खेलमा भने कर्णाली याक्सविरुद्ध ६ विकेटको हार व्यहोरेको थियो । चौथो खेलमा सुदूरपश्चिम रोयल्सविरुद्ध ३३ रनको जित निकालेको चितवनले पाँचौँ खेलमा लुम्बिनी लायन्सविरुद्ध ३३ रनका पराजय व्यहोरेको थियो ।