काठमाडौं । नेपाल प्रिमियर लिग (एनपीएल)मा जनकपुर बोल्ट्स प्लेअफमा पुग्ने पहिलो टिम बनेको छ । जनकपुरले बिहीबार काठमाडौं गुर्खाजविरुद्ध पाँच विकेटको जित निकालेसँगै प्रतियोगिताको प्लेअफमा स्थान सुनिश्चित गरेको हो ।

बिहीबार कीर्तिपुरस्थित त्रिवि क्रिकेट मैदानमा सम्पन्न खेलमा काठमाडौंले प्रस्तुत गरेको १०२ रनको लक्ष्य जनकपुरले १५.५ ओभरमा पाँच विकेट गुमाएर पूरा गर्‍यो ।

प्रतियोगितामा छैटौँ खेल खेलेको जनकपुरको यो पाँचौँ जित हो । जनकपुरले प्रतियोगिताको पहिलो खेलमा विराटनगर किंग्सविरुद्ध आठ विकेटको, दोस्रो खेलमा कर्णाली याक्सविरुद्ध आठ विकेटको, तेस्रो खेलमा पोखरा एभेन्जर्सविरुद्ध सात विकेटको र चौथो खेलमा लुम्बिनी लायन्सविरुद्ध एक रनको जित निकालेको थियो । पाँचौँ खेलमा भने जनकपुर सुदूरपश्चिम रोयल्ससँग ७२ रनले पराजित भएको थियो ।

जनकपुरको जितमा जिम्मी निसमले १७ बलमा एक चौका र तीन छक्कासहित २७ रन बनाए । ४४–४ को कठिन स्थितिबाट निसमले पाँचौँ विकेटका निम्ति हर्ष थाकेरसँग ३३ रनको साझेदारी गर्दै जनकपुरलाई जित नजिक डोहोर्‍याएका थिए ।

अविजित रहेका थाकेरले २५ बलमा एक चौका र एक छक्कासहित २५ रन बनाए । थाकेरसँगै अविजित रहेका मोहमद मोहसिनले सात बलमा तीन चौकासहित १३ रन जोडे ।

जनकपुरका कप्तान लहिरु मिलान्थाले १६ रन थप्दा, कप्तान अनिल साहले ११ रन बनाए । सुवास कंसाकारले पाँच र आसिफ सेखले दुई रन जोडे ।

काठमाडौंका कप्तान करण केसीले दुई विकेट लिए । साहब आलम, गेरहार्ड इरास्मस र दिपेश कँडेलको नाममा समान एक विकेट रह्यो ।

त्यसअघि टस जितेर ब्याटिङमा आएको काठमाडौंले १९.३ ओभरमा सबै विकेट गुमाएर १०१ रनको योगफल खडा गरेको थियो ।

काठमाडौंका गेरहार्ड इरास्मसले सर्वाधिक २० रन बनाए । उनले २२ चौका प्रहार गरे । कप्तान करण केसीले १३ बलमा दुई चौका र एक छक्कासहित १९ रन थपे । साहब आलम आठ रनमा अविजित रहे ।

ओपनर स्टेफन एस्किानजीले १९ बलमा दुई चौकाहित १७ रन जोडे । यसबाहेक, अन्य ब्याटरले दोहोरो अंकमा रन जोड्न सकेनन् । 

त्यसअघि काठमाडौंले ओपनर माइकल लेभिटलाई आठ र भीम सार्कीलाई चार रनको व्यक्तिगत स्कोरमा गुमाएको थियो । राशिद खानले सात, प्रतिक श्रेष्ठले ६ र राशिद खानले एक रन थपे । काठमाडौंका सुमित महर्जन र दिपेश कँडेल ‘डक’ भए ।

काठमाडौंविरुद्ध जनकपुरका ललितनारायण राजवंशीले तीन विकेट लिए । चार ओभर बलिङ गरेका ललितले दुई मेडन फ्याँक्दै आठ रनमात्र खर्चिए । उनले काठमाडौंका स्टेफन एस्किनाजी, सुमित महर्जन र प्रतीक श्रेष्ठको विकेट लिए ।

योसँगै ललित प्रतियोगितामा सर्वाधिक विकेट लिने बलर बनेका छन् । उनले हालसम्म ६ खेल खेल्दा ११ विकेट लिएका छन् । उनलाई पछ्याइरहेका जनकपुरकै किशोर महतोले ६ खेलमै १० विकेट लिएका छन् ।

ललितबाहेक, शेर मल्लले पनि तीन विकेट लिए । ३.३ ओभर बलिङ गरेका शेरले ११ रनमा खर्चिए । शेरले डान डाउथवेट, करण केसी र दिपेश कँडेलको विकेट लिए । 

मोहमद मोहसिनले दुई विकेट लिए । चार ओभर बलिङ गरेका मोहसिनले २० रनमात्र खर्चिए । उनले भीम सार्की र गेरहार्ड इरास्मसलाई पभेलियनको दिशा देखाएका थिए । 

यस्तै, किशोर महतो र अर्निको यादवले समान एक विकेट लिए । किशोरले माइकल लेभिट र अर्निकोले राशिद खानको विकेट लिएका थिए ।

जितसँगै ६ खेलबाट १० अंक जोडेको जनकपुर तालिकाको शीर्ष स्थानमा उक्लिएको छ । पाँच खेलबाट चार अंक जोडेको काठमाडौं तालिकाको चौथो स्थानमा छ । 

काठमाडौंले यसअघिका चार खेलमध्ये दुईमा जित र दुईमा हार बेहोरेको छ । काठमाडौंले पहिलो खेलमा चितवन राइनोजविरुद्ध पाँच विकेटको हार बेहोरेको थियो ।

दोस्रो खेलमा कर्णालीविरुद्ध तीन विकेटले पराजित भएको काठमाडौंले चौथो खेलमा सुदूरपश्चिम रोयल्ससँग पुनः ७३ रनको हार बेहोरेको थियो । चौथो खेलमा भने काठमाडौंले लुम्बिनी लायन्सविरुद्ध १८ रनको जित निकालेको थियो ।

तस्बिरहरू : सुनिल प्रधान/बाह्रखरी