काठमाडौं । सुदूरपश्चिम रोयल्सका अलराउन्डर इशान पाण्डेले नेपाल प्रिमियर लिग (एनपीएल)मा जनकपुर बोल्ट्सविरुद्ध खेल्नुअघि टिममा कुनै पनि दबाब नभएको प्रतिक्रिया दिएका छन् । जनकपुरले प्रतियोगितामा चौथो जित निकाल्ने क्रममा बुधबार जनकपुरलाई ७२ रनले पराजित गरेको थियो ।

कीर्तिपुरस्थित त्रिवि क्रिकेट मैदानमा भएको खेलमा १२४ रनको लक्ष्यसहित मैदान उत्रिएको जनकपुरलाई सुदूरपश्चिमले ५१ रनमै समेटेको थियो । जनकपुरविरुद्ध ब्याटिङ र बलिङ दुवैमा राम्रो योगदान पुर्‍याएका इशान खेलको ‘प्लेयर अफ दी म्याच’ समेत घोषित भएका थिए ।

खेलपछि इशानले जनकपुरविरुद्ध खेल्नुअघि सुदूरपश्चिममाथि कुनै दबाब नरहेको बताए । “दबाब हामीलाई एक प्रतिशत पनि थिएन । बिहानैदेखि हार्ने कुरा दिमागमा नै थिएन । जनकपुर बोल्ट्स टेबलमा हामीभन्दा एक स्थान माथि छ, उनीहरूलाई हरायो भने यसअघिका शंका सबै मेटिन्छ भन्ने सबैभन्दा ठूलो मोटिभेसन थियो,” इशानले भने, “बीचमा दीपेन्द्र दाईसँग खेल्दा धेरै सजिलो भयो । ब्रायन लारा आउने कुराले निक्कै उत्साहित छु । सानैदेखि टीभी खोल्नासाथ ब्रायन लारा र सौरभ गांगुली आउथ्यो । लारासँग एकपटक भेटेर छोटो कुरानकानी गर्न पाए पनि क्रिकेट खेलेको सार्थक हुन्छ जस्तो लाग्छ ।”

जितसँगै पाँच खेलबाट आठ अंक जोडेको सुदूरपश्चिम अंकतालिकाको शीर्ष स्थानमा उक्लिएको छ । सुदूरपश्चिमले अंक तालिकामा जनकपुर बोल्ट्सलाई नै पछि पारेको हो । तालिकाको दोस्रो स्थानमा रहेको जनकपुरले पनि पाँच खेलबाट आठ अंक नै जोडेको छ ।