काठमाडौं । नेकपा (माओवादी केन्द्र) का अध्यक्ष एवं पूर्वप्रधानमन्त्री पुष्पकमल दाहाल 'प्रचण्ड'ले इजरायलले प्यालेस्टाइनी नागरिकमाथि नरसंहार गरेको बताएका छन् । सोमबार काठमाडौंको रत्नपार्कमा 'प्यालेस्टाइनीमाथि इजरायली जनसंहारविरुद्व देशव्यापी हस्ताक्षर अभियान'को उद्घाटन गर्दै उनले इजरायलले प्यालेस्टाइनमाथिको ज्यादतीविरुद्ध विगतदेखि नै विश्वव्यापीरूपमा आवाज उठ्दै आएको बताए ।

"अहिले पछिल्लो चरणमा खासगरी प्यालेस्टाइनको गाजामा भएको अत्याचार, नरसंहारको पनि विश्वव्यापीरूपमा विरोध हुँदै आएको छ । संयुक्त राष्ट्रसंघमा पनि यसका बारेमा पटकपटक प्रस्ताव पारित हुने गरेका छन् । तर ती सबैलाई पनि अटेरी गर्दै जसरी नरसंहार र नाकाबन्दीको निरंकुश तरिका अपनाइएको छ," उनले भने ।

अमानवीय ढंगले भइरहेको आक्रमणविरुद्ध सबैले आवाज उठाउनुपर्ने उनको भनाइ छ । "२१औँ शताब्दीको सभ्य समाज भनिन्छ । लोकतन्त्रको युग भन्ने गरिन्छ । तर, यो २१औँ शताब्दीको सभ्य भनिएको समाजमा लोकतन्त्रको नयाँ युग भनिएको बेलामा पनि यति अमानवीय ढंगले अस्पतालमा बालबालिकादेखि निर्दोष र निरपराध मान्छेहरूको नरसंहार गरेको देख्नुपरेको छ, मानव जातिले । त्यसकाविरुद्ध विश्वव्यापी आवाज उठाउन हामी सबैको कर्तव्य हुन आउँछ," उनले भने ।

७ अक्टोबर २०२३ मा इजरायलले गाजामा आक्रमण गरेको थियो । तत्कालीन समयमा नेपालका प्रधानमन्त्री प्रचण्ड नै थिए । अहिले २०२४ को डिसेम्बर ९ मा आएर तत्कालीन प्रधानमन्त्री प्रचण्डसहितका नेताहरूले गाजामाथिको आक्रमण रोक्नुपर्ने मागसहित हस्ताक्षर अभियान थालेका हुन् ।