काठमाडौं । स्पेनिस ला लिगामा रियाल मड्रिडले एथ्लेटिक बिल्बाओसँग २–१ को हार व्यहोर्दा शीर्ष स्थानको बार्सिलोनासँग अंक दूरी घटाउने अवसर गुमाएको छ ।

तालिकाको दोस्रो स्थानमा रहेको रियालले बार्सिलोनाभन्दा चार अंकले पछि छ । बुधबार राति सम्पन्न खेलमा जित निकाल्दा रियाल र बार्सिलोनाबीचको अंक दूरी एक अंकमात्रै हुने थियो । 

सान मामेसमा भएको खेलमा घरेलु टिमलाई जित दिलाउन एलेसान्ड्रो रेमिरो र गोर्को गुरुजेटाले गोल गरे । रियालका जुड बेलिङ्घमले एक गोल फर्काए पनि टिमको हार टार्न सकेनन् ।

खेलमा तीनै गोल दोस्रो हाफमा भएको हो । ५३औँ मिनेटमा रेमिरोले गोल गर्दै बिल्बाओलाई अग्रतामा राखेका थिए । तर, ७८औँ मिनेटमा बेलिङ्घमले गोल गरेपछि रियाल खेलमा फर्कियो । त्यसको दुई मिनेटपछि नै गुरुजेटाले गोल गर्दै बिल्बाओलाई पुनः २–१ को अग्रतामा राखे । यही गोल निर्णायक बन्दा बिल्बाओले रियालसँग तीन अंक खोसेको हो ।

जितसँगै १६ खलबो २९ अंक जोडेको बिल्बाओ तालिकाको चौथो स्थानमा उक्लिएको छ । १५ खेलबाट ३३ अंक जोडेको रियाल भने तालिकाको दोस्रो स्थानमा छ । तालिकाको शीर्ष स्थानमा आसिन बार्सिलोनाले भने १६ खेलबाट ३७ अंक जोडेको छ ।