काठमाडौं । काँचको पर्दा हुँदै रजतपटमा उक्लिएका कलाकार जितु नेपाल पछिल्लो समय चलचित्रमा व्यस्त छन् । जितु चरित्र अभिनेता हुँदै मुख्य भूमिकामा आइसकेका छन् । जितु मुख्य भूमिकामा रहेको चलचित्र ‘ज्वाइँ साब’ गएको दसैँमा रिलिज भएको थियो । ‘ह्यारी कि प्यारी’मा पनि उनी मुख्य भूमिकामा थिए, जुन चलचित्रले उनलाई हिरो बन्ने अवसर प्रदान गरेको थियो ।

समय फेरियो, दर्शक फेरिए । मेकर नयाँ आए, कथा भन्ने शैलीमा बदलाव आयो । अनि, मौका पाउन थाले सहायक भूमिकामा काम गर्दै आएका जितुलगायत कलाकारले । योसँगै भत्कियो टल एन्ड हेन्डसम व्यक्ति मात्र हिरो हुन्छ भन्ने मानक ।

अहिले व्यक्तिभन्दा पनि कथा हिरो हुने समय आएको जितु बताउँछन् । त्यसको उदाहरण विजय बराल र आफू स्वयं भएको उनको भनाइ छ । त्यसो त यसको श्रेय दयाहाङ राई, सौगात मल्ललाई पनि जाला । त्योभन्दा अगाडि जाने हो भने पनि केही चलचित्र र यस्ता पात्र छन् ।

नेपाली दर्शकको टेस्ट परिवर्तन हुँदै गएको जितुले महसुस गरेका छन् । दर्शकले ठेट नेपाली चलचित्र हेर्न थालेको उनको निष्कर्ष छ । त्यसैले यसलाई उनी आत्मसात् गर्दै छन् । 

कसरी ? 

जितु आफैँ चलचित्र बनाउँदै छन्, जसमा लगानी केही साथीसहित उनी स्वंयले गर्नेछन् । कथा लेख्दै छन् । अभिनय गर्दै छन् । निर्देशन आफैँ गर्दै छन् । र, यो चलचित्र हुनेछ ठेट नेपाली । उनकै शब्दमा– आमनेपालीका दुःखसुख समेटिएको चलचित्र हुनेछ । दर्शकले हेर्न चाहेजस्तो हुने उनको दाबी छ ।

भलै, सबै चलचित्र चल्छन् भन्ने छैन । सबै राम्रा चलचित्र चल्दैनन् । र, चलेका सबै चलचित्र राम्रा हुँदैनन् । जितु यो तथ्यलाई स्वीकार गर्छन् । उनी सिनेमा चल्ने र नचल्ने विषयमा केही पक्ष भाग्यमा पनि छोड्छन् । यसको आधार उनी कति राम्रा चलचित्र नचलेको र औसत सिनेमा चलेको विगतलाई मान्छन् । 

० ० ०

मुख्य भूमिकामा देखिइसकेका जितुले अब सहायक रोल स्वीकार गर्छन् कि गर्दैनन् ? मुख्य भूमिकामा नै हुनुपर्छ भन्ने अबको उद्देश्य नभएको उनी बताउँछन् ।

“यही चलचित्रमा काम गर्न पाए हुन्थ्यो भनेर वर्षौँ संघर्ष गरियो । हिरो पाउँदा मात्रै खेल्ने, सहायक भूमिका नखेल्ने भन्ने हुँदैन,” उनी प्रस्ट पार्छन्, “कस्तो रोल छ भनेर हेर्छु होला । तर, सहायक रोल गर्दिनँ भन्ने हुँदैन । मेरो रोलको प्रभाव कति छ भन्ने मुख्य कुरा हो । दुई सिन मात्रै छ भने पनि राम्रो छ भने त्यसले अर्थ राख्छ । त्यस्तो रोल लामो होस् वा छोटो खेल्छु ।”

जितु कुनै समय ‘छक्का पञ्जा’का कलाकार थिए । दीपकराज गिरी र दीपाश्री निरौलाको टिममा थिए । सँगै काम गर्थे । सिनेमा मात्र होइन, अरू कार्यक्रममा पनि उनीहरूको सहकार्य थियो ।

तर, दीपक–दीपा र जितुले सहकार्य टुंग्याए । उनीहरूले छुट्टाछुट्टै काम गर्न थालेको पनि धेरै भइसक्यो । ‘छक्का पञ्जा’सँगको सहकार्य टुटेपछि नै जितुले ‘ह्यारी कि प्यारी’मा मुख्य भूमिकामा काम गर्ने मौका पाएका थिए । मुख्यसँगै सहायक भूमिकामा पनि जितुले काम गरिरहेका छन् ।

‘छक्का पञ्जा’बाट सहायक क्यारेक्टरका निम्ति अफर आए जितुले के गर्लान् ? गर्दिनँ भन्नुपर्ने कुनै कारण नरहेको उनी प्रस्ट पार्छन् । आफू जुनसुकै टिमसँग कार्य गर्न स्वतन्त्र रहेको र दिएको पात्र चित्त बुझे काम गर्ने उनी बताउँछन् । चरित्र र पारिश्रमिक चित्त बुझे काम गर्न तयार रहेको उनले सुनाए ।

“सबै आफ्ना हुन्, सबै सहकर्मी हुन् । काम गर्दै जाँदा मनमुटाव हुन्छ होला, त्यो स्वाभाविक हो । आफ्नै दाजुभाइसँग त कति लामो समय भेटघाट र बोलचाल हुँदैन । साथीभाइ र काम एकै ठाउँ गर्ने भन्ने हुँदैन,” जितु भन्छन्, “त्यसैले योसँग काम गर्ने योसँग नगर्ने भन्ने हुँदैन । हिजो कलाकार बन्न पाए हुन्थ्यो भनेर खाली पेट र खाली खुट्टा संघर्ष गरियो । आज त्यही काम पाउँदा योसँग गर्ने र नगर्ने भन्ने हुँदैन ।”

काँचको पर्दाका कलाकार हुन् वा स्टेजका, पछिल्लो समय अधिकांशको गन्तव्य रजतपट बनेको छ । किन ? टेलिभिजन कार्यक्रम सुस्ताउनु मुख्य कारण भएको उनको भनाइ छ । 

टेलिभिजनका दर्शकलाई लक्षित गरे युट्युबतिरका छुट्ने, युट्युबका दर्शकलाई लक्षित गरे टेलिभिजन हेर्नेबाट कन्टेन चिप भएको प्रतिक्रिया आउने उनी बताउँछन् । त्यसैले सानो पर्दाका कलाकारको गन्तव्य सेतो पर्दा हुने गरेको उनको ठहर छ ।