काठमाडौं । माट्रिका आइ सेन्टरले ४० वर्षमाथिका नागरिकको आँखाको उपचारका निम्ति ‘प्रेस बाइ म्याक्स’ उपचार पद्धति सुरु गरेको छ । सो उमेरसमूहका व्यक्तिमा हुने दुष्टिदोषको समस्याका निम्ति प्रेस बाइ म्याक्स प्रविधिबाट शल्यक्रिया सेवा सुरु गरिएको सेन्टरले जनाएको छ । 

वरिष्ठ रेफ्रियाक्टिभ सर्जनहरुको टोलीले सेन्टरमा एक महिनाअघिबाट यो सेवा सुरु गरेको हो ।  ४० वर्षभन्दा माथि उमेरका व्यक्तिले  यो शल्यक्रियापछि स्पष्ट आँखा देख्नसक्ने सेन्टरका रिफ्राक्टिभ सर्जन डा.शाश्वत ढुंगेलको भनाइ छ । 

प्रेस बाइ म्याक्स प्रविधि विश्वमै दृष्टिको उपचारका निम्ति नयाँ प्रविधी भएको र नेपालमा नेपालमा पहिलोपटक सेन्टरले भित्र्याएको उनको दाबी छ । 

के हो त प्रेस बाइ म्याक्स प्रविधि ? कति खर्चिलो ?

प्रेस बाइ म्याक्स प्रविधि रिफ्राक्टिभ लेजर सर्जरीभित्रको एउटा उपचार विधी हो । डा. ढुंगेलका अनुसार यसले ४० वर्ष उमेर पार गरेका मानिसको दृष्टिमा भएको कुनै पनि प्रकारको समस्या समाधान गर्नसक्छ । 

उनका अनुसार यो विधिबाट डेस्कटप कम्प्युटर, टेलिभिजन र वरिपरिका दृश्यहरु अर्थात् इन्टरमिडिएट भिजन देख्न गाह्रो हुने बिरामीको पनि उपचार गर्न सकिन्छ । सेन्टरमा दुवै आँखाको यो विधीबाट लेजर सर्जरी गर्दा  ९५ हजार रुपैयाँ खर्च लाग्छ । 

आँखामा कुनै पनि प्रकारका कडा रोग नभएका बिरामीको प्रेस बाइ म्याक्स गर्न मिल्ने डा. ढुंगेल बताउँछन्  । उनका अनुसार मोतिबिन्दूका विभिन्न चरणमा पुगेका र जलबिन्दू तथा रेटिनाको कडा रोग भएका बिरामीमा प्रेस बाइ म्याक्समार्फत् शल्यक्रिया गर्न मिल्दैन ।  

त्यस्तै, आँखाको नानी ज्यादै पातलो भएमा, कमजोर भएमा पनि यो विधी अपनाउन मिल्दैन ।