काठमाडौं । पूर्वकानुनमन्त्री एवं पूर्वमहान्यायाधिवक्ता अग्नि खरेलले पूर्वसभामुख दमननाथ ढुंगानाले नेपालको संसद्ले एक असल अनुयायी र नेता गुमाएको बताएका छन् । सोमबार सामाजिक सञ्जालमा उनले सभामुखको आसनमा तटस्थ भूमिका निर्वाह गर्नुपर्छ भन्ने प्रेरणा ढुंगानाबाट अरूले पाउने उल्लेख गरेका छन् ।

“नेपालको संसद्ले यस व्यवस्थाको एक असल अनुयायी र नेता गुमाएको छ भने सभामुखको आसनमा बसेर तटस्थ भूमिका निर्वाह गर्नुपर्छ भनी एउटा मानक बनाउने स्वर्गीय कृष्णप्रसाद भट्टराई (२०१५ साल), स्वर्गीय सुवासचन्द्र नेम्वाङ (२०६३ पछि पटकपटक) र तपाईं (दमननाथ ढुंगाना २०४८)लाई सदैव सम्झनेछ र अरूलाई प्रेरणा दिनेछ,” उनले लेखेका छन् ।

उनले ढुंगानाको निडर र हक्की स्वभाव रहेको स्मरण गरेका छन् । “तपाईंको निडर एवं हक्की स्वभाव, आफूलाई लागेका विचार निर्धक्क ढंगले व्यक्त गर्न सक्ने क्षमता, आफूले बोलिरहँदा सबैलाई आफूतिर आकर्षित गर्न सक्ने खुबी र आफ्ना भिन्न धारणालाई सशक्त ढंगले प्रस्तुत गर्ने नवीन शैली तपाईंका अनुकरणीय गुणहरू हुन् । मेरो विचारमा यिनै गुणले तपाईंलाई ‘दमननाथ’ बनाएको हो र बनाइरहनेछ,” खरेलले लेखेका छन् ।

पूर्वसभामुख ढुंगानाको ८३ वर्षको उमेरमा उपचारका क्रममा आइतबार फ्रन्टलाइन अस्पतालमा निधन भएको थियो ।