काठमाडौं । प्रधानमन्त्री केपी शर्मा ओलीले सरकार गठन भएको १०० दिनमा देशभरका १५ लाख दूध किसानलाई ६० करोड रुपैयाँ रकम निकासा गरिएको बताएका छन् । 

सरकार गठन भएको सय दिन पुगेको अवसरमा बुधबार सम्बोधन गर्दै प्रधानमन्त्री ओलीले भने, “बितेको एक सय दिनमा, लगभग १५ लाख दुग्ध किसानले भुक्तानी पाएका छन् । उनीहरूले पाउने रकम भुक्तानीका लागि सरकारले ६० करोड रुपैयाँ निकासा गरेको थियो ।”

लामो समयदेखि ३५ जिल्लाका ३० लाखभन्दा बढी किसानहरू दूधको भुक्तानी नपाएर कठिनाइमा रहेको उनले जनाए । 

त्यसैगरी, करिब ७५ हजार उखु किसानहरू जसले वर्षौंदेखि आफ्नो पसिनाको मूल्य पाउन सकेका थिएनन् । उनीहरूले पनि आफ्नो अनुदानवापतको भुक्तानी पाइसकेको दाबी प्रधानमन्त्री ओलीको छ ।

“कृषिबाली तथा पशुधन बिमामा समावेश भएका हजारौँ कृषकहरूले पनि अब राहतको श्वास फेरेका छन् । बितेको एक सय दिनमा, तिनीहरूको बिमा वापतको भुक्तानी गर्न ८० करोड रुपैयाँ बिमा प्राधिकरणको खातामा पठाइएको छ,” प्रधानमन्त्री ओलीले भने ।

उनले हिउँदे बालीका लागि चाहिने रासायनिक मलको बन्दोबस्त गरिसकिएको पनि जनाए ।