काठमाडौं । नेपाल समाजवादी पार्टीका अध्यक्ष एवं पूर्वप्रधानमन्त्री बाबुराम भट्टराईले सरकारले आफूनिकट भ्रष्टहरूलाई संरक्षण गरिरहेको आरोप लगाएका छन् । 

ओम्नी, सहकारी, भुटानी शरणार्थी प्रकरणलगायत काण्डहरूमा ठूला दलका सबैजसो नेताहरू संलग्न रहे पनि सरकारले अरूलाई तर्साएर आफू निकटका भ्रष्टहरूलाई जोगाउने काम गरेको बताए ।

सोमबारबाट पोखरामा सुरु भएको पार्टीको विधान अधिवेशनमा अध्यक्ष भट्टराईले सबै दलहरू भ्रष्टाचारमा लिप्त रहेकाले उनीहरूलाई समेत छानबिन गर्न एक छुट्टै संस्थाको आवश्यक रहेको बताए ।

"आफ्नो भ्रष्टाचारीलाई च्यापेको छ । अनि, अर्को भ्रष्टाचारीलाई लगेर तर्साएको छ । अनि म सुशासन कायम गर्ने भनेर कुर्लिराखेको छ । भ्रष्टाचारी यिनै हुन् । चाहे बुढीगण्डकी आयोजना भन्नुस्, चाहे ओम्नी काण्ड भन्नुस् । चाहे भुटानी शरणार्थी काण्ड भन्नुहोस् । चाहे सहकारी काण्ड भन्नुहोस् । यसमा सबै दलहरू मुछिएका छन्," उनले भने ।

राष्ट्रपति, प्रधानमन्त्री लगायतका व्यक्ति र शक्तिहरूलाई कारबाहीको दायरामा ल्याउने खालको संस्था नबनाई मुलुकमा भ्रष्टचारको अन्त्य र सुशासन कायम नहुने भट्टराईले बताए । उनले भ्रष्टाचार नियन्त्रणको कुरा मुखले भनेर मात्रै नहुने पनि दोहोर्‍याए ।