काठमाडौं । नेपाली कथानक चलचित्र ‘ज्वाइँ साब’ले विस्तारै ‘पिकअप’ लिइरहेको निर्माणपक्षले जनाएको छ । सुरुका दुई दिन राम्रो अकुपेन्सी नदेखिए पनि त्यसपछि विस्तारै ‘ज्वाइँ साब’ हेर्ने दर्शकको संख्या बढेको निर्देशक वसन्त निरौलाले जानकारी दिए । 

“सुरुमा हामीले शो टिकाउन सकेनौँ । बुकिङ धेरै नहुँदा शो घट्यो । तर दुई दिनपछि जति शो पाएको छ, त्यसमा दर्शकको अकुपेन्सी बढेर ८० प्रतिशतसम्म पुगेको छ,” निर्देशक निरौलाले भने । 

‘ज्वाइँ साब’का मुख्य कलाकार जितु नेपाल पछिल्ला दिनमा सिनेमाले राम्रो अकुपेन्सीमा चलिरहेको बताउँछन् । “म विभिन्न हलमा पुगेर दर्शकको प्रतिक्रिया लिइरहेको छु,” उनले भने, “उत्साहजनक रूपमा दर्शकको उपस्थिति भइरहेको छ । सिनेमा हेरेर दर्शकले राम्रो रहेको बताइरहनु भएको छ ।” 

निर्माणपक्षले बक्सअफिस कलेक्सन भने सार्वजनिक गरेको छैन । 

काठमाडौं उपत्यकामा क्यूएफएक्सले शो बाँडफाँट गर्दा ‘१२ गाउँ’ले २२ शो पाउँदा ‘ज्वाइँ साब’ले २१ शो पाएको थियो । फूलपातीका दिन ‘ज्वाइँ साब’, ‘१२ गाउँ’ र ‘छक्का पञ्जा–५’ एकै दिन रिलिज भएका थिए । 

वसन्त निरौला निर्देशित ‘ज्वाइँ साब’मा जितु नेपाल र नीति शाह मुख्य भूमिकामा छन् । बुद्धि तामाङ, हिमेश पन्त, रमेश वुढाथोकी, सन्दीप क्षेत्री, कविता आले, शिशिर वाङ्देल, दीपक आचार्य (काकु), राजकुमार पण्डित, निमा पाण्डे, कमलमणी नेपाल, प्रकाश घिमिरेलगायतको पनि यो सिनेमामा अभिनय छ । 

रेड आई फिल्मस्को प्रस्तुति र मौसम फिल्मस्को सहकार्यमा निर्माण भएको सिनेमाका कार्यकारी निर्माता विजय बस्याल हुन् ।

सिनेमामा मीनादेवी खड्का, सौगात पण्डित र पदमलाल तामाङको लगानी छ । राजकुमार पण्डितको प्रस्तुतिमा बनेको सिनेमामा अर्जुन पोखरेल र महेश ताम्राकारको संगीत, श्याम तामाङको छायांकन, सविन अधिकारीको कथा, सन्देश शाहको सम्पादन तथा सञ्जय थापाको एक्सन छ ।