काठमाडौं । यो वर्ष नेपाल राष्ट्र बैंकले नयाँ नोट छापेन । विगतमा नयाँ नोटले दसैँ मनाउँदै आएका सर्वसाधारणले यो वर्ष सुकिलाले टार्नुपर्ने भएको छ ।

राष्ट्र बैंकका अनुसार, एकपटक जारी गरिएका नयाँ नोट बजार पुगेर बैंकमा फर्किएका हुन्छन् । ती नै हाल बैंकहरूले दसैँका निम्ति साटिदिँदै आएका छन् । तर, यसरी दिइने नोट सुकिला हुने राष्ट्र बैंकले जनाएको छ ।

विगतका वर्षमा राष्ट्र बैंकले ५, १०, २०, ५० र १०० का १००/१०० नयाँ नोट सटही गर्दै आएको थियो ।

राष्ट्र बैंकसँग प्रशस्त पैसा भएको र नयाँ नोट छाप्न लागत बढी लाग्ने हुँदा आर्थिक संकटको समयमा बचत गरिएको राष्ट्र बैंकका प्रवक्ता रामु पौडेलले बताए । यो वर्ष राष्ट्र बैंकमा भएकै सुकिला नोटले काम चलाउन पनि नयाँ नोट नछापिएको उनले जानकारी दिए ।

तर, सरकारले १०० रुपैयाँको नोटमा नेपालको चुच्चे नक्सा छाप्ने निर्णय गरेको र त्यसको तयारी नहुँदा यो वर्ष पुरानै नोटले टार्न खोजिएको कतिपयको भनाइ छ । प्रवक्ता पौडेलले भने सरकारले गरेको निर्णयलाई राष्ट्र बैंकले कार्यान्वयन गर्ने भएकाले यसमा केही समस्या नभएको जिकिर गरे । चुच्चे नक्साले कुनै समस्या नपारेको उनको भनाइ छ ।

एकपटक प्रयोग गरिएका नोटहरू बजारमा प्रशस्तै भएकाले नयाँ वितरण नगरिएको उनले बताए । “राष्ट्र बैंकले एकपटक धेरै वर्षलाई पुग्ने गरी नोट छाप्ने भएकाले बजारमा पठाउन नोटको अभाव छैन,” उनले भने, “चुच्चे नक्साका कारण नयाँ नोट राष्ट्र बैंकले वितरण नगरेको हैन । दसैँका समयमा नयाँ नोट पठाउँदा अनावश्यक खर्च लाग्ने गर्छ । नयाँ नोट बजारमा पठाउँदा पुरानो नोट ल्याएर त्यसलाई नष्ट गर्नुपर्ने हुन्छ । यसमा जनताको ठूलो रकम जान्छ ।”

अनावश्यक खर्च बचत होस् भनेर पनि एकपटक प्रयोग गरिएको नोटको सदुपयोग गर्न खोजिएको पौडेलले स्पष्ट पारे ।

यही असोज १३ देखि २२ गतेसम्म दसैँलक्षित सुकिला नोट सटही गरिँदै छ । राष्ट्र बैंकको मुद्रा व्यवस्थापन विभाग, बैंकिङ विभाग र प्रदेशस्थित सातै कार्यालयबाट सुकिला नोट सटही गर्ने व्यवस्था मिलाइएको उनले जानकारी दिए ।