काठमाडौं । जासुसी र गुप्तचरमा अब्बल मानिने इजरायलले बेलायतका पूर्वप्रधानमन्त्री बोरिस जोनसनको पनि जासुसी गरेको रहस्य खुलेको छ । बेलायतका पूर्वप्रधानमन्त्री बोरिस जोनसनले प्रकाशित हुन लागेको पुस्तक ‘अनलिस्ड’मा इजरायली प्रधानमन्त्री बेन्जामिन नेतन्याहुले आफ्नो शौचालयमा जासुसी यन्त्र लगाएको दाबी गरेका छन् ।

जोनसनको यो पुस्तक १० अक्टोबरमा सार्वजनिक हुनेछ । सन् २०१७ मा जोनसन बेलायतका विदेशमन्त्री थिए भने नेतन्याहु प्रधानमन्त्री । 

प्रधानमन्त्रीका रूपमा सन् २०१७ मा नेतन्याहु बेलायत भ्रमणमा आएका थिए । बेलायत भ्रमणका क्रममा नेतन्याहु र जोनसनको बेलायतको विदेश मन्त्रालयको कार्यालयमा भेटघाट भएको थियो । उक्त भेटघाटका क्रममा नेतन्याहुले जोनसनको निजी शौचालय प्रयोग गरेका थिए । 

नेतन्याहु शौचालयबाट बाहिर निस्किएको केही समयपछि जोनसनका सुरक्षाकर्मीले शौचालयबाट आवाज सुन्न मिल्ने यन्त्र बरामद गरे । कार्यालयमा जोनसनको शौचालय गोप्य स्थानमा थियो । शौचालय गएका नेतन्याहु केहीबेर शौचालयमा बसे । 

टेलिग्राफ पत्रिकासँग जोनसनले यस विषयमा थप विवरण आफ्नो किताबमा लेखेको उल्लेख गरेका छन् । जासुसी यन्त्रका विषयमा इजरायललाई प्रश्न गरियो वा प्रष्टिकरण सोधियो अथवा सोधिएन भन्ने कुरा अहिलेसम्म यकिन छैन । 

इजरायलले अमेरिकी राष्ट्रपति भवन ह्वाइट हाउसमा जासुसी गरेको आरोप पनि छ । सन् २०१९ मा अमेरिकाले इजरायलले आफूमाथि जासुसी गरिरहेको निष्कर्ष निकालेको थियो । 

ह्वाइट हाउस नजिकै मोबाइल फोन निगरानी गर्ने यन्त्र राखिएको अमेरिकाले फेला पारेको थियो । सन् २०१६ देखि २०१८ सम्म जोनसन बेलायतका विदेशमन्त्री थिए । सन् २०१९ देखि २०२२ सम्म उनी प्रधानमन्त्री पदमा थिए । 

कोभिड–१९ को लकडाउनका क्रममा प्रधानमन्त्रीको निवास क्षेत्रमा लकडाउनको नियम उल्लंघन गर्दै पार्टी गरेको आरोप लागेपछि जोनसनले राजीनामा दिएका थिए ।