काठमाडौं । मध्यरातमा महिलाको शव बोकेका एक युवाले केही पर सडक छेउमा लगेर फाल्छन् । त्यसपछि उनी आफ्नो गन्तव्यतिर लाग्छन् । सबै दृश्य सीसीटीभी फुटेजमा कैद हुन्छ । फुटेज प्रहरीको अनुसन्धानको विषय बन्छ । अनुसन्धानमा खटिएका प्रहरीले सीसीटीभी फुटेजकै आधारमा शव फ्याँक्ने युवालाई पक्राउ गर्छन् ।

प्रायः चलचित्र देखिने र सुनिने यो घटना यसपटक काठमाडौंको कालीमाटीमै भएको छ । यही मंसिर ७ गतेको घटना विवरण आज सार्वजनिक भएको हो । सीसीटीभीमा देखिएको दृश्यपछि काठमाडौं उपत्यका अपराध अनुसन्धान कार्यालयको टोलीले ती व्यक्तिको खोजी र घटनाको विवरण संकलनमा खटिएको छोटो समयमै शव बोकेर हिँड्ने युवालाई पक्राउ गर्न सफल भएको छ । 

काठमाडौं उपत्यका अपराध अनुसन्धान कार्यालयका प्रहरी उपरीक्षक अंगुर जीसीले घटनामा संलग्न व्यक्ति बझाङका २२ वर्षीय कविन्द्र मल्ल रहेको र उनलाई पक्राउ गरी अनुसन्धान थालिएको जानकारी दिए ।

उनका अनुसार, आज काठमाडौं जिल्ला अदालतमा पेस गरिएकामा उनीमाथि अनुसन्धान गर्न पाँच दिनको म्याद थप गरिएको छ । 

अनुसन्धानमा उनी लागुऔषध प्रयोगकर्ता भएको खुलेको छ । महिलाको शव बोकेर फाल्ने समयमा उनले लगाएको चप्पल, ट्राउजर र ज्याकेटका आधारमा प्रहरीले खोजी सुरु गरेको थियो । उनलाई त्यही अवस्थामा भेटिएको जीसीले जानकारी दिए ।

मल्लले सीसीटीभी फुटेजमा देखिएका व्यक्ति आफू भएको प्रहरीसमक्ष स्वीकार गरेका छन् । हाल महिलाको शव परीक्षणका लागि पठाइएको र त्यसको ‘रिपोर्ट’ आउन बाँकी रहेकाले घटनाको कारण खुल्न सकेको छैन । प्रहरीका अनुसार  महिलामाथि बलात्कार भएको आशंका गरिएको छ । रासस