काठमाडौं । काठमाडौं र धादिङको सिमानामा पर्ने झ्याप्लेखोलामा शनिबार ठूलो पहिरो खसेको छ । पहिरोमा केही गाडी पुरिएको छ ।
पहिरोमा फसेका यात्रु र सवारीसाधनको उद्धार कार्य जारी छ । पहिरोमा पुरिएका दुई गाडीबाट आठ पुरुष, पाँच महिलासहित १४ जनाको शव निकालिएको सशस्त्र प्रहरीले जानकारी गराएको छ ।
सशस्त्र प्रहरीका अनुसार, लु१ज ४५७८ नम्बरको माइक्रोबसबाट पाँच शव निकालिएको छ । अल्फाबेट, नम्बर केही नखुलेको बसबाट नौ गरी १४ जनाको शव निकालिएको सशस्त्र प्रहरीले जनाएको छ ।
एउटा हायस र भारतीय नम्बरप्लेटको मालवाहक ट्रक पनि पहिरोबाट निकालिएको छ । दुई जेसीबीको सहायतामा पहिरो पन्छाउने कार्य जारी रहेको सशस्त्र प्रहरीले जनाएको छ ।
त्रिभुवन राजमार्गअन्तर्गत काठमाडौंको चन्दागिरि नगरपालिका–२ र धादिङको धुनिबेँसी नगरपालिका–९ स्थित सिमानामा पर्ने नागढुंगा–नौबिसे सडकखण्डको झ्याप्लेखोलामा पहिरो खसेको हो ।
लेदो बगिरहेकाले उद्धारमा कठिनाइ भएको प्रहरीले जनाएको छ । पुरिएका बस निकाल्ने प्रयास जारी रहेको र प्रहरीले थप क्षतिको आशंका गरेको छ ।