सिन्धुली । बाढीका कारण थुनिएका सिन्धुलीको सुनकोसी गाउँपालिका–१ स्थित आदिलिंग कुशेश्वर महादेव मन्दिर परिसरमा रहेको गुरुकुलका ३३ जनाको उद्धार गरिएको छ । नेपाली सेनाको हेलिकोप्टरमार्फत उनीहरूको उद्धार गरिएको हो ।

सुनकोसी नदीको बीचभागमा अलपत्र परेका गुरुकुलका २६ बटुक (विद्यार्थी), तीन शिक्षक, दुई कर्मचारी र मन्दिरका दुई पुजारीको उद्धार गरिएको जिल्ला प्रहरी कार्यालयका प्रहरी उपरीक्षक गोविन्दराज काफ्लेले जानकारी दिए ।

उनीहरू शुक्रबार रातिदेखि सुनकोसीको बाढीमा फसेका थिए । सुनकोसी र रोशीखोलाको बाढी मन्दिर रहेको क्षेत्रमा पसेपछि उनीहरू बीचभागमा थुनिएका थिए ।

मन्दिरको चारैतिर बाढी पसेपछि सुरक्षित स्थानमा जान नसकेका गुरुकुलका सबैजनाको सकुशल उद्धार गरिएको प्रमुख जिल्ला अधिकारी लीलाप्रसाद शर्माले बताए ।

रोशी र सुनकोसी नदीको बाढीले सुनकोसी–५, मुल्कोट र गोलञ्जोर गाउँपालिका–७, खुर्कोट बजार समेत डुबानमा परेको छ । दुम्जाका पाँच घर बाढीले बगाएको छ । दुम्जा र नेपालथोक बीचको बीपी राजमार्गको केही भाग बाढीले बगाएको छ । हाल उक्त क्षेत्रमा यातायात सेवा बन्द छ । रासस