काठमाडौं । नेकपा (माओवादी केन्द्र)का अध्यक्ष पुष्पकमल दाहाल 'प्रचण्ड'ले राष्ट्रिय परिस्थिति सामान्य नरहेको बताएका छन् । अनेरास्ववियु (क्रान्तिकारी)को राष्ट्रिय सम्मेलनलाई सम्बोधन गर्ने क्रममा प्रचण्डले विश्वमा देखिएको अस्वस्थ प्रतिष्पर्धाले असर गरेको बताए ।

“नेपालको राष्ट्रिय स्वाधीनतामाथि दबाब र हस्तक्षेप बढ्दै गएका छन् । विदेशी शक्ति केन्द्रको चलखेल बढ्दै छ । राष्ट्रिय स्वाधीनतामाथि चुनौती खडा भएको छ,” उनले भने ।

उनले भारत र चीनसँगको भूराजनीतिक अवस्थितिको केन्द्रविन्दु नेपाल हुन सक्ने खतरा रहेको बताए । दक्षिण एसियालाई कब्जामा लिन शक्ति केन्द्र लागिरहेको दाबी उनको छ ।

प्रचण्डले विद्यार्थीहरू नयाँ आन्दोलन, कार्यक्रम लिएर जानुपर्ने भनाइ राखे । उनले आफूहरूले सरकारमा रहँदा भ्रष्टाचार, भूमाफियाविरुद्ध महाभियान छेडेको जिकिर गरे ।

उनले विद्यार्थी संगठनलाई सडकको बाघ भएर निस्कन पनि अपिल गरे । प्रचण्डले केही सयममा नै कम्युनिस्ट एकता र मोर्चाबारे नयाँ खबर दिइने बताए ।

“केही समयभित्र तपाईंहरूले नयाँ समाचार सुन्नुहुने छ । एकता र मोर्चाको त्यो अभियानमा हामी लागिरहेका छौँ,” उनले भने ।