ललितपुर । सिंगापुरमा भलिबल सिकेकी ज्याक्युशा थापाले ललितपुर क्विन्सबाट एभरेस्ट महिला भलिबल लिग खेल्ने भएकी छन् । जावलाखेलस्थित जावलाखेल भलिबल तालिम केन्द्रमा शनिबार भएको ट्यालेन्ट हन्ट कार्यक्रममार्फत ज्याक्युशा ललितपुर क्विन्स छनोट भएकी हुन् ।

करिब ४५ सहभागीबाट उनी छनोट हुन सफल भएकी हुन् । क्लबका प्रशिक्षक उत्सव खड्का र व्यवस्थापक श्रद्धा क्षेत्रीले उनलाई आइतबार क्लबमा स्वागत गरे ।   

ललितपुरस्थित नखिपोटमा बस्ने ज्याक्युशा जेम्स उच्च शिक्षा संस्थानमा अध्ययनरत कक्षा १२ कि छात्रा हुन् । उनको बुवा सिंगापुर प्रहरी भएकोले उनको बाल्यकाल सिंगापुरमै बितेको थियो । उनले सिंगापुरमा आफू पढ्ने विद्यालयमा नै भलिबल सिक्ने अवसर पाएकी थिइन् ।

पहिलोपटक व्यावसायिक भलिबलतर्फ पाइला सर्दै गरेकी उनी उत्साहित साथै नर्भस भएकी बताउँछिन् । "ठुलो प्रतियोगिताबाट नै आफ्नो करियर सुरु गर्न पाउँदा उत्साहित त छु नै, साथै नर्भस पनि महसुस हुँदै छ," छनोट भएपछि ज्याक्युशाले भनिन् ।

पाँच फिट ८ इन्च कद भएकी आउटसाइड हिटर खेल्छिन् ।       

ज्याक्युशाको आगमन सँगै ललितपुर क्विन्सको टोली पूरा भएको छ । क्लबले विदेशी खेलाडी पनि अनुबन्धन गरिसकेको छ । विदेशी खेलाडीको विवरण भने केही दिनमा सार्वाजनिक गर्ने छ ।