पोखरा । गोर्खा मिडिया नेटवर्कका पूर्वसञ्चालक छविलाल जोशीलाई आजै पोखरा ल्याउने तयारी गरिएको छ । आइतबार काठमाडौंबाट पक्राउ परेका नेपाल प्रहरीका पूर्वडीआईजीसमेत रहेका जोशीलाई आज साँझ ८ बजेतिर पोखरा ल्याउने तयारी गरिएको हो ।

प्रहरी स्रोतका अनुसार, जोशीलाई साँझ ८ बजे बुद्ध एयरको उडानमार्फत पोखरा ल्याइने छ ।

संसदीय समितिले सहकारीहरूको रकम दुरुपयोग र अपचलनमा जोशीलाई पनि कारबाही सिफारिस गरेको थियो । विभिन्न सहकारीको रकम ऋणको रूपमा निकाल्ने काममा जोशीको भूमिका रहेको समितिको निष्कर्ष छ । सोही निर्णय कार्यान्वयनको क्रममा जोशी पक्राउ परेका हुन् ।

छानबिन प्रतिवेदन अनुसार, सुरुमा जीबी राई र जोशीको आधा–आधा लगानीमा गोर्खा मिडिया नेटवर्क खोलेका थिए । त्यसअघि उनीहरू नेटवर्किङ व्यवसायमा साझेदार थिए । जोशीले नै बयानमा आफ्नो १५ प्रतिशत सेयर घटाएर त्यो हिस्सा रवि लामिछानेलाई दिएको बताएका थिए ।

प्रतिवेदन अनुसार, छविले बुटवलको सुप्रिम सहकारीबाट दुई करोड ५० लाख रुपैयाँ ऋण लिएर गोर्खा मिडियामा लगानी गरेका थिए । वीरगन्जको सानो पाइला सहकारीबाट उनले एक करोड ८६ लाख रुपैयाँ ऋण लिएका थिए ।

समितिले जीबी राईसहित कुमार रम्तेल, रवि लामिछाने र जोशीलाई प्रचलित कानुन अनुसार कारबाही गर्न सिफारिस गरेको थियो ।