site stats
बाह्रखरी :: Baahrakhari
खेल
मधेस युनाइटेडमा ट्यालेन्ट हन्टबाट छानिइन् मीना

काठमाडौं । एभरेस्ट महिला भलिबल लिग (ईडब्ल्यूभीएल)का निम्ति मधेस युनाइटेडले ट्यालेन्ट हन्टबाट मीना चौधरीलाई छनोट गरेको छ । गएको शुक्रबार वीरगन्जको ज्ञानदा एकेडेमीमा भएको ट्यालेन्ट हन्ट कार्यक्रमबाट मधेस टिमका मुख्य प्रशिक्षक भरत यादव र व्यवस्थापकको समूहले मीनालाई छनोट गरेको हो ।

एकदिने ट्यालेन्ट हन्ट कार्यक्रममा यसअघि राष्ट्रिय र अन्तर्राष्ट्रियस्तरमा नखेलेका प्रतिभावान् खेलाडीहरू उपस्थित थिए । तर, ट्यालेन्ट हन्टबाट एक खेलाडी मात्र छनोट गर्ने कार्यक्रमानुसार मीना छानिएकी हुन् ।

उनले अब यही असोज १४ देखि १९ गतेसम्म काठमाडौंको त्रिपुरेश्वरस्थित कभर्डहलमा हुने पहिलो संस्करणको ईडब्ल्यूभीएलमा मधेस युनाइटेडको प्रतिनिधित्व गर्ने अवसर पाउनेछिन् ।

योसँगै मधेस १२ खेलाडीको कोटा पूरा गर्ने पहिलो टिम समेत बनेको छ । आयोजकको नियमानुसार हरेक टिममा १२ खेलाडी हुनेछन् । तीमध्ये मार्कीसहित आठ खेलाडी ड्राफ्टमार्फत टिममा राखिएको थियो । तीन विदेशी खेलाडी अनुबन्ध गर्न पाउने नियम छ ।

मधेसले विदेशी खेलाडीमा काजखस्तानकी आउटसाइड हिटर कालिनोभा यभजेनिया, ट्युनिसियाकी मिडल ब्लकर योस्रो जेरामदिनी र भारतीय भलिबल टिमकी कप्तान तथा सेटर जिनी कोभातलाई अनुबन्ध गरिसकेको छ ।

यस्तै, नेपाली राष्ट्रिय भलिबल टिमकी सदस्य निरुता ठगुन्ना मधेस युनाइटेडकी मार्की प्लेअर छिन् ।

ट्यालेन्ट हन्टबाट छनोटपछि टिम उत्कृष्ट बनेको मधेस युनाइटेडका मुख्य प्रशिक्षक यादवले जनाएका छन् ।

प्रकाशित मिति: आइतबार, असोज ६, २०८१  १५:४९
प्रतिक्रिया दिनुहोस्