काठमाडौं । भक्तपुर क्यान्सर अस्पताल विकास समिति गठन आदेश २०७७ माथिको संशोधन प्रस्ताव मन्त्रिपरिषद् बैठकबाट स्वीकृत भएको छ ।

स्वास्थ्य तथा जनसंख्या मन्त्रालयको सो प्रस्ताव बिहीबारको मन्त्रिपरिषद् बैठकबाट स्वीकृत भएको हो ।  

यसअघि नेपाल अर्बुद रोग निवारण संस्थाबाट सरकारले आफैँ सञ्चालन गरेको अस्पताल अब विकास समितिमार्फत सञ्चालन हुनेछ । प्रस्ताव स्वीकृत भएसँगै तीन सयभन्दा बढी कर्मचारीको वृत्ति विकासको बाटो खुलेको स्वास्थ्यमन्त्री प्रदीप पौडेलले बताए ।

सरकारले अस्पतालको स्वामित्व ग्रहण गर्नुअघि स्थायी कर्मचारीलाई २०७७ को गठन आदेशले करारमा राख्ने व्यवस्था गरेको थियो । पहिले स्थायी रहेर पनि करारमा परिणत भएका कर्मचारी अब स्थायी हुनेछन् ।

साथै, अब नयाँ नियमावलीअनुसार नयाँ करार कर्मचारीलाई लोकसेवामार्फत स्थायी हुने बाटो समेत खुलेको छ ।