काठमाडौं । नेपाली कांग्रेसका महामन्त्री विश्वप्रकाश शर्माले राष्ट्रिय स्वतन्त्र पार्टी (रास्वपा)लाई पार्टीको नाम फेर्न सुझाव दिएका छन् । उनले 'स्वतन्त्र' शब्दलाई हटाएर दलको नयाँ नाम राख्न आग्रह गरेका छन् ।

"नयाँ दलको प्रथम राष्ट्रिय सम्मेलन सफलताको शुभकामनासहित सुझाव– कतिपय असन्तुष्टिको माहोलमा स्वतन्त्र मन बनाएका कतिपय नागरिकको भावनात्मक आवेग क्यास गर्न स्वतन्त्र नाम रोज्नुभयो, एउटा आकार बनाउनुभयो । अब स्वतन्त्र छाडेर दलको नाम जुराउने साहस राख्नुस्," शर्माले मंगलबार सामाजिक सञ्जाल एक्समा लेखेका छन् ।

काठमाडौंको कमलादीस्थित प्रज्ञा भवनमा मंगलबारदेखि रास्वपाको प्रथम राष्ट्रिय सम्मेलन सुरु भएको छ ।

महामन्त्री शर्माले सहकारी ठगी प्रकरणबारे संसदीय छानबिन समितिको प्रतिवेदनमा भएका विषयवस्तुलाई रास्वपाका नेताहरूले अपव्याख्या गरेको पनि बताएका छन् ।

"क्लिन चिट कि क्लियर चिट स्पष्ट हुनुस् । प्रचलित कानुनबमोजिम कारबाहीका लागि सिफारिस गर्ने प्रतिवेदनको यो सुस्पष्ट निर्णय पढौँ, भ्रम नछरौँ । बरु क्लियर चिट किटान गरेको छ प्रतिवेदनले । चिटको अर्थ बेइमानी, अंग्रेजीका ज्ञाता मित्रहरू बुझ्नु हुन्छ नै," उनले भनेका छन् ।