काठमाडौं । जिल्ला प्रहरी परिसर काठमाडौंले भदौ १८ गते बूढानीलकण्ठका ३३ वर्षीय आशीष देउलासहित ४ जनालाई पक्राउ गर्‍यो । 

काठमाडौंका विभिन्न डान्सबारहरुबाट युवायुवतीहरुलाई प्रलोभनमा पारेर क्लब पार्टी र हाउस पार्टी गर्ने भन्दै आफ्नो घरमा लैजाने र घरमा लगिसकेपछि उनीहरुले नशालु पदार्थ सेवन गर्न लगाएर युवायुवतीलाई यातना दिने गरेको प्रहरीको प्रारम्भिक अनुसन्धानबाट खुलेको छ ।

देउला समूहबाट चरम यातना भोगेका दुई युवाले दिएको उजुरीको कारण प्रहरीले उनीहरुलाई पक्राउ गरेको हो । 

पक्राउ पर्नेमा देउलासहित टोखा नगरपालिका– ३ का २७ वर्षीय राजेन्द्र घले, उदयपुरका २२ वर्षीय ओजस्वी तामाङ र चितवनका २२ वर्षीय साजन गुरुङ छन् । उनीहरु १० दिनदेखि प्रहरीको हिरासतमा छन् । 

पक्राउ परेकाहरुमाथि अपहरण शरीर बन्धक र ज्यान मार्ने उद्योग अन्तर्गतको मुद्दामा प्रहरीले अनुसन्धान जारी राखेको छ ।  पक्राउ परेकामध्ये आशीष देउला मूख्य योजनाकार हुन् । उनकै योजनाअनुसार पक्राउ परेका युवाहरुले अन्य युवायुवतीहरुलाई बूढानीलकण्ठस्थित देउलाको घरमा पु¥याउने काम गर्थे ।

घरमा पुर्‍याएपछि भने नशालु पदार्थ खुवाएर इलेक्ट्रिक आइरन, नक्कली पेस्तोल देखाएर तर्साउने काम गर्ने गरेको पाइएको छ । 

शनिबारसमेत थप एक पीडित पनि प्रहरीको सम्पर्कमा पुगेका छन् । प्रहरी परिसर काठमाडौंका एसपी नवराज अधिकारीका अनुसार प्रहरीको प्रारम्भिक बयानका क्रममा देउलाले प्रतिशोधका कारण पीडितहरुको शरीरमा आइरन लगाउने काम गरेको बताएका छन् । 

उनीहरुको साथबाट प्रहरीले इलिक्ट्रिक आइरन, नक्कली पेस्तोल, ह्यामरलगायत बरामद गरिसकेको छ । 

एसपी अधिकारीले भने, “प्रारम्भिक सोधपुछका क्रममा प्रतिशोध लिन पीडितको शरीरमा आइरन लगाएको हौँ भन्छन् । हामी अनुसन्धान गर्दैछौँ । उनीबाट अन्य पीडित भएका भए प्रहरीको सम्पर्कमा आउन आग्रह पनि गरेका छौँ ।”

बूढानीलकण्ठमा देउलाको आलिसान महल

यसरी जघन्य अपराधमा संलग्न आशिष देउला काठमाडौंकै सम्पन परिवारमा जन्मिएका युवा हुन् ।  उनका बुवा निर्माण व्यवसायी थिए । त्यसैले आशीषलाई आर्थिक अभाव भएन ।  दिनभर घरमै बस्ने आशिष साँझ भने काठमाडौंका विभिन्न क्लबहरुमा पुग्थे । उनी महंगा मानिएका क्लबका नियमित ग्राहक नै हुन् ।

‘सुगर ड्याडीको रुपमा क्लबमा’

आशीष साधारण भेषमा क्लब जाँदैनथे । दिनमा सामान्य रुपमा काम गर्ने आशीष, जब साँझ पर्थ्यो उनको भेष नै बदलिन्थ्यो । 

उनी झट्ट हेर्दा उमेरले ७० वर्षको हाराहारी देखिने, अनुहार बुढेशकालले चाउरीएको, तालु खुइलिएको नकाब लगाएर सुगर ड्याडीको भेषमा ठेमलका क्लबमा मनोरञ्जन गर्थे ।  आशीष सामाजिक सञ्जालमा पनि भिडियोहरु पोष्ट गर्थे । सुगर ड्याडी नाम रहेका आफ्ना सामाजिक सञ्जालमा क्लब र बारमा पैसा उडाएकोलगायतका भिडियोहरु पोस्ट गर्ने गरेको पाइएको छ ।

प्रहरीका अनुसार आशीष क्लब छिर्नासाथ उनी बसेको टेबलमा युवायुवतीहरु झुम्मिने गरेको पाइएको र त्यही बेला केही युवासँग आशीषको लफडा भयो । त्यसरी क्लबमा लफडा गर्नेहरुलाई आफ्नै घरमा हाउस पार्टी गर्ने भन्दै आफू बस्दै आएको बूढानीलकण्ठ नगरपालिकाको–१ नम्बर वडामा पुर्‍याए ।

पीडित युवाहरु घर पुर्‍याएको दिन भने आशिषकी श्रीमती घरमा थिइनन् । आशीषका अन्य परिवार बस्ने अर्कै घर छ । करिब एक रोपनी जग्गामा बनेको आशीषको आलिसान महलमा उनी एक्लै बस्छन् । त्यही कारण उनको घरमा राति के हुन्छ छिमेकी कसैलाई पनि थाहा हुँदैन । 

आशीषले भने क्लबबाट पार्टीको नाममा घरमा पुर्‍याएका युवायुवतीलाई यातना दिने र त्यसैमा मज्जा लिने गरेको खुलेको हो । हालसम्म पीडित तीनजना युवाहरु सम्पर्कमा आए पनि केही युवतीहरुमाथि समेत यातना गरेको आंशका प्रहरीको छ । 

प्रहरीका अनुसार उनी राति हिँड्दा करोड बढी पर्ने मित्सुबिसी ब्रान्डको पजेरो चढ्ने गरेको पाइएको प्रहरीले जनाएको छ ।