काठमाडौं । प्रधानमन्त्री केपी शर्मा ओलीले पेरिस पारा ओलम्पिक २०२४ मा कांस्यपदक विजेता पलेसा गोवर्द्धनसहित प्रशिक्षक र टिम व्यवस्थापकलाई शुक्रबार पुरस्कृत गरेका छन् । पलेसालाई ६५ लाख रुपैयाँ नगद राशिसहित पुरस्कृत गरिएको हो ।

यस्तै, उक्त खेलका प्रशिक्षक कविराज नेगी लामालाई पाँच लाख ८५ हजार र टिम व्यवस्थापक रामचन्द्र श्रेष्ठलाई दुई लाख ९२ हजार रुपैयाँसहित सम्मान गरियो ।

कार्यक्रममा प्रधानमन्त्री ओलीले खेलमा विजय हासिल गरेपछि छिटोछिटो पुरस्कार दिने र राशिमा कर नकटाउने नीति लिइएको बताए । उनले आउँदा विश्वस्तरका खेलमा नेपालले थप सफलता पाउने विश्वास व्यक्त गरे ।

पलेसाले हासिल गरेको सफलता नेपालले प्राप्त गरेको हालसम्मैको ठूलो पदक भएकाले देशले गौरव गरेको उनले बताएको प्रधानमन्त्रीको सचिवालयले जानकारी गराएको छ ।

प्रधानमन्त्रीको सरकारी निवास बालुवाटारमा युुवा तथा खेलकुुद मन्त्रालयले उक्त कार्यक्रम आयोजना गरेको थियो । कार्यक्रममा खेलकुुदमन्त्री तेजुलाल चौधरी, सचिव सुमनराज अर्याल, राष्ट्रिय खेलकुुद परिषद्का सदस्यसचिव टंकलाल घिसिङ, नेपाल तेक्वन्दो संघका पदाधिकारीलगायत व्यक्ति सहभागी थिए ।