काठमाडौं । सर्लाहीकी कञ्चन रौनियारले दाइजोको निहुँमा आफूमाथि अमानवीय घटना भएको भन्दै श्रीमान्‌विरुद्ध जिल्ला प्रहरी कार्यालयमा जाहेरी दिएकी छिन् ।

कञ्चनको सर्लाहीको हरिवन नगरपालिका–९ का रोहित गुप्तासँग १० असार २०७९ मा विवाह भएको थियो । विवाहलगत्तै गुप्ताको परिवारले दाइजोको निहुँमा कञ्चनलाई यातना दिन सुरु गरेको थियो ।

कञ्चनले जाहेरीमा उल्लेख गरेअनुसार विवाहकै समयमा माइती पक्षले १५ लाख रुपैयाँ र करिब १८ लाख बराबरको गरगहनासँगै घरायासी सामान पनि दाइजो दिएको थियो । तर, विवाहको दुई महिनापछि नै फेरि उनीसँग ५० लाख रुपैयाँ माग गरिएको थियो ।

कञ्चनका अनुसार २०७९ को छठ पर्वपश्चात् उनलाई घरबाट निकाला गरियो । त्यसयता उनी माइतीमा बस्दै आएकी छन् । यही बीचमा कञ्चनको माइतीले ६ लाख रुपैयाँ नगद र १० लाख रुपैयाँ चेकमार्फत दिएको कुरा उनले जाहेरीमा उल्लेख गरेकी छन् । यति हुँदा पनि गुप्ताको परिवारले आफूलाई कुटपिट गर्ने र निरन्तर दुव्र्यवहार गर्ने गरेको कञ्चनले जाहेरीमा उल्लेख गरेकी छन् । नगरपालिकाको न्यायिक समिति र स्थानीय प्रहरीले समेत सहयोग नगरेको कुरा उनले जाहेरीमा लेखेकी छन् ।