काठमाडौं । प्रमुख प्रतिपक्ष दल नेकपा (माओवादी केन्द्र)का सांसद देवेन्द्र पौडेलले गौरा पर्वमा नारा लगाउँदा पक्राउ गरिएका युवालाई रिहा गर्न माग गरेका छन् । बिहीबार प्रतिनिधिसभा बैठकमा उनले ती युवाले कसैलाई हात नहालेको पनि बताए ।

“टुँडिखेलमा गिरफ्तार भएका युवाहरूले कुनै अपराध गरेका छैनन् । गोपीकृष्ण, दीपक र रामबहादुरले कसैलाई हात हालेका छैनन् । कसैमाथि हमला गरेका छैनन्,” पौडेलले भने ।

नारा लगाएकै आधारमा गिरफ्तार नगर्न उनले आग्रह गरे । “कसैको बारेमा नारा लगाए, भिडियो फुटेज हेरियोस् । त्यतिका आधारमा गिरफ्तार नगरियोस् । रिहाइ गरियोस्,” उनले भने ।

जनताले लडेर ल्याएको व्यवस्था प्रयोग गर्न पाउने अधिकार उनीहरूसँग रहेको उनले उल्लेख गरे ।

यही भदौ १३ गते काठमाडौंको टुँडिखेलमा प्रधानमन्त्री केपी शर्मा ओली र नेपाली कांग्रेसका सभापति शेरबहादुर देउवाविरुद्ध नाराबाजी गरेको भन्दै तीनजनालाई प्रहरीले पक्राउ गरेको छ । सुर्खेतका गोपीकृष्ण जैसी, कञ्चनपुरका दीपक ठगुन्ना र अछामका रामबहादुर बुढालाई पक्राउ गरिएको हो । सार्वजनिक शान्तिविरुद्धको मुद्दामा उनीहरूविरुद्ध अनुसन्धान थालिएको छ ।