काठमाडौं । साउदी प्रो लिगमा क्रिस्टियानो रोनाल्डोको कप्तानीमा रहेको अल–नासरले पहिलो जित निकालेको छ । नासरले मंगलबार भएको खेलमा अल फेइहाविरुद्ध ४–१ को सहज जित निकालेको हो ।

किंग अब्दुल्लाह स्पोर्ट सिटी रंगशालामा भएको खेलमा अल–नासरलाई जित दिलाउन टालिस्काले दुई गोल गरे । यस्तै, रोनाल्डो र मार्सेलो ब्रोजोभिचले समान एक गोल थपे । अल फेइहाका फासन साकालाले एक गोल फर्काएका थिए ।

खेलको पाँचौँ मिनेटमा टालिस्काले गोल गर्दै अल–नासरलाई अग्रतामा राखेका थिए । पहिलो हाफको इन्जुरी समयमा पोर्चुगिज स्टार रोनाल्डोले अल–नासरको अग्रता दोब्बर बनाए । ८५औँ मिनेटमा ब्रोजोभिचको गोलमा नासरले अग्रतालाई ३–० मा पुर्‍याएको  थियो । तर, त्यसको अर्को मिनेटमा नै साकालाले गोल फर्काउँदै अल फेइहालाई ३–१ को स्थितिमा ल्याए । 

इन्जुरी समयमा टालिस्काले दोस्रो गोल गरेपछि नासरले सहज जितसहित तीन अंक पक्का गरेको हो । जितसँगै दुई खेलबाट चार अंक जोडेको नासर तालिकाको दोस्रो स्थानमा उक्लिएको छ । लिगको दुवै खेलमा पराजित भएको अल फेइहा भने तालिकाको पुछारमा छ ।