काठमाडौं । नेपाली कांग्रेसका सांसद डा. नारायण खड्काले ९ मिनेट ३० सकेन्डको प्रश्न सोधेपछि प्रधानमन्त्री केपी शर्मा ओलीले कटाक्ष गरेका छन् । 

बिहीबारको प्रतिनिधिसभा बैठकमा प्रधानमन्त्रीसँगको प्रश्नोत्तरमा खड्काले बधाई दिँदै लामो प्रश्न सोधेका थिए । सभामुख देवराज घिमिरेले खड्काले नै ९ मिनेट ३० सेकेन्ड लिएको बताए । उनले प्रश्न संक्षिप्त गर्ने गरेको सुनाए । 

आजको बैठकमा १३ जनाले नाम टिपाएका छन् । प्रश्नोत्तरको समय एक घण्टा राखिएको सभामुखले जानकारी गराए । त्यसको जवाफ दिने क्रममा प्रधानमन्त्री केपी शर्मा ओलीले खड्काको प्रश्न कहाँनिर हो भन्ने आफूले पत्ता लगाउन नसकेको बताए । ओलीले त्यसो भन्दा संसद्‌मा हाँसो चल्यो ।

“माननीय सदस्यले प्रश्न कहाँनिर गर्नुहुन्छ भनेर ध्यानपूर्वक सुनिरहेको थिएँ । खासमा प्रश्न फेला पार्नै मुस्किल पर्‍यो,” प्रधानममन्त्री ओलीले भने, “यो प्रश्नभन्दा पनि सुझावपत्र जस्तो छ । यसमा प्रश्नमा भन्दा पनि सोलुशन आफैँमा आएको छ ।”