काठमाडौं । नेपाली कांग्रेसको सोमबारको केन्द्रीय समिति बैठकमा बोल्दै केन्द्रीय सदस्य सुजता परियारले हतारमा संविधान संशोधन गरिए देशमा अस्थिरता आउनसक्ने बताएकी छन् । संविधान सबै दल र नेपाली जनताको सहमतिको दस्ताबेज भएको भन्दै दुईतिहाइ छ भन्दैमा संविधान संशोधन गरिहाल्न नहुने बताइन् । 

“सरोकारवाला सबै पक्षलाई विश्वासमा नलिइ दुईतिहाइको भरमा संविधान संशोधन गरिनुहुँदैन । हतारमा संविधान संशोधन गर्‍यौँ भने देशमा अस्थिरता निम्तन सक्छ,” उनले बैठकमा भनिन्, “भर्खरै बंगलादेशमा भएको राजनीतिक घटनाक्रमलाई हेर्न सकिन्छ । नेपालमा पनि त्यस्तो अवस्था नआउँला भन्न सकिँदैन ।”

उनले महासमिति बैठकबाट हस्ताक्षर भएर उठान भएको बैद्धिक सनातन हिन्दु राष्ट्र स्थापनाको एजेन्डालाई सम्बोधन गर्नुपर्ने धारणा राखिन् । साथै, भातृ संघसंस्थाहरू पार्टीको अभिन्न अंग भएको भन्दै उनले उनीहरूलाई बलियो बनाउन लामो समयदेखि रोकिएको अधिवेशन चाँडै गराउनुपर्ने उल्लेख गरिन् ।