काठमाडौं । ललितपुरको महालक्ष्मी नगरपालिका–२ का रामप्रसाद पौडेल ८१ वर्षको उमेरका जेल पुगे । उपत्यका अपराध अनुसन्धान कार्यालय ललितपुरको टोलीले पौडेललाई गत साउन १८ मा पक्राउ गरेको थियो ।

उनलाई प्रहरीले पक्राउ गरेको दोस्रो दिनमा नख्खु कारागार पठाएको हो । पाँच वर्षदेखि फरार पौडेललाई प्रहरीको टोलीले ललितपुरको झम्सिखेलबाट पक्राउ गरेको थियो । पौडेललाई उच्च अदालत पाटनले बैंकिङ कसुर मुद्दामा २०७७ मंसिरमा दोषी ठहर गर्दै जेल सजायको फैसला सुनाएको थियो । 

तत्कालीन उच्च अदालतका न्यायाधीश लोहितचन्द शाह र ईश्वरराज आचार्यको संयुक्त इजलासले पौडेललाई दोषी ठहर गर्दै सात दिन जेल सजाय हुने फैसला गरेको थियो । तर, पौडेल भने त्यतिबेलादेखि भाग्दै आएका थिए । साउन १८ गते भने उनी झम्सिखेलको विगमार्टबाट पक्राउ परेका हुन् । प्रहरीका अनुसार उच्च अदालतको फैसला लगत्तै उनी महालक्ष्मीको घर छाडेर छोरी ज्वाइँको घर झम्सिखेल बस्दै आएका थिए ।

त्यही सूचनाका आधारमा अदालतले दोषी ठहर गरेको पाँच वर्षपछि प्रहरीले पक्राउ गर्न सफल भएको हो ।

५८ लाख रुपैयाँ लिएर फिर्ता दिएनन्
प्रहरीका अनुसार रामप्रसादले २०७५ मा काठमाडौंको टोखा नगरपालिका–१० का ५८ वर्षीय लोकेन्द्रनारायण श्रेष्ठबाट ५८ लाख २१ हजार रुपैयाँ क्रण मागेका थिए ।

उनकै साथीमार्फत् चिनजान हुन पुगेका पौडेलले विश्वासमा पारेर लोकेन्द्रबाट उक्त रकम लिएका थिए ।  तर, रकम लिएपछि भने पौडेलले फिर्ता गर्न खोजेनन् । उल्टै लोकेन्द्रको सम्पर्कबाट भाग्न थाले ।

०७५ वैशाख ३० मा भेटिएका पौडेलले आफूसँग ‘क्यास’ रकम नभएको भन्दै आफ्नो खाता रहेको सनराइज बैंकको चेक दिए । त्यहीबेला पौडेलले ५८ लाख २१ हजारको छुट्टाछुट्टै दुई वटा चेक थमाइदिएका थिए । तर, उक्त चेक साटिएन । लोकेन्द्रले बारम्बार चेक नसाटिएको जानकारी गराए । तर, उनी सम्पर्कविहीन हुन पुगे ।

लोकेन्द्रले आफ्नो रकम फिर्ता नपाएपछि भने अदालत गुहार्न बाध्य भए । अदालतले ५८ लाख २१ हजार नै पीडितलाई भराउने र त्यही बराबरको जरिवाना समेत गरेको छ ।

त्यस्तै, दुई लाख ३२ हजार ८४० रुपैयाँ समेत क्षतिपूर्ति भराउने फैसला गरेको थियो । सात दिनको कैद सजाय काटे पनि जरिवाना रकम र बिगो तिर्न नसक्दा उनी जेलमा बस्नु परेको हो ।