काठमाडौं । निष्क्रिय रहेका नेता मणि थापा नेकपा (एमाले)को जिम्मेवारीबाट हटाइएका छन् । एमालेले उनलाई स्थायी कमिटीबाट हटाएको हो । बिहीबार बसेको सचिवालय बैठकले स्थायी कमिटीको  रिक्त पद पूर्ति पनि गरेको छ । हिजो बैठकले नेकपा (एकीकृत समाजवादी) छाडेर एमाले फर्किएका मुकुन्द न्यौपानेलाई स्थायी कमिटी सदस्य बनाएको छ ।

त्यस्तै, लीलानाथ श्रेष्ठ स्थायी कमिटी सदस्य मनोनीत भएका छन् । हिजोको बैठकले स्थायी कमिटी सदस्य गुरु बराललाई पार्टीको उपाध्यक्ष मनोनीत गर्‍यो । उनी बढुवा भएपछि पद रिक्त भयो । रिक्त पदमा दुई नेता स्थायी कमिटीमा बढुवा भए ।

“पद रिक्त भएपछि हिजो दुई नेतालाई स्थायी कमिटी सदस्यमा मनोनीति गरेको हो,” प्रचार विभाग प्रमुख राजेन्द्र गौतमले भने ।

नेकपा विभाजन भएपछि माओवादीमा नफर्किएका थापा पार्टीमा केही समययता निष्क्रिय थिए । १४ महिनाअघि एमालेले नेताहरूलाई फरक भूगोलको जिम्मेवारीबाट दिएको थियो । त्यतिबेला उनी बिदामा थिए ।

आफ्नो कामका कारण विदामा बसेको प्रतिक्रिया दिएका थिए । अहिले भने उनलाई एमालेले बिदा गरेको हो । थापाले पार्टी छाडेको हो भन्ने प्रश्नमा गौतमले भने, “उहाँ पार्टीमा सक्रिय नभएपछि के बुझ्ने ? उहाँको स्थानमा अर्का नेतालाई स्थायी कमिटी सदस्य मनोनीत गरिएको हो ।”

उनलाई ०८० साउनको सचिवालय बैठकले सोधपुछ गर्ने निर्णय गरेको थियो ।

• मणि थापालाई सोधपुछ गर्ने एमालेको निर्णय

एमालेका सचिव लेखराज भट्टले थापा सम्पर्कमा नै आउन नचाहेको बताए । “मैले पनि उहाँलाई पटक–पटक सम्पर्क गरेँ । उहाँ पार्टीको सम्पर्कमा नै आउन चाहनुभएन,” भट्टले बाह्रखरीसँग भने, “सम्पर्कमा नै नआएपछि उहाँलाई जिम्मेवारी दिने कुरा भएन ।”

एमालेले स्थायी कमिटी सदस्यबाट पार्टीको वेबसाइटबाट पनि उनको नाम हटाइसकेको छ ।

• एमाले कार्यविभाजन : किन बिदामा बसे मणि थापा ?