काठमाडौं । नेकपा एमालेले केन्द्रीय नेताहरुको जिम्मेवारी हेरफेर गरेको छ । नेकपा एमालेका अध्यक्ष केपी शर्मा ओलीले हालै सम्पन्न केन्द्रीय कमिटी र सचिवालय बैठकको निर्णय समेटेर जारी गरेको अन्तरपार्टी निर्देशन–५ मा नेताहरुको नयाँ जिम्मेवारी तोकिएको छ ।

एमालेले स्थायी कमिटी सदस्य र पोलिट्ब्यूरो सदस्यलाई जिल्ला कमिटीको इन्चार्जको जिम्मा दिएको छ । नेताहरुलाई जिम्मेवारी तोकिँदा स्थायी कमिटी सदस्य मणि थापालाई जिम्मेवारी तोकिएको छैन । उनको जिम्मेवारी दिने ठाउँमा बिदा लेखिएको छ । पूर्वमाओवादीबाट आएका नेता थापा केही समययता पार्टीमा असन्तुष्ट रहेको बताइन्छ । 

एमाले नेताहरूको जिम्मेवारीमा व्यापक हेरफेर : कसलाई कुन जिम्मेवारी ?

वैशाख २८–३० गतेसम्म काठमाडौंमा बसेको केन्द्रीय कमिटी बैठकमा उनी उपस्थित थिएनन् ।  आफू काठमाडौं बाहिर भएकाले नआउने जानकारी पार्टीलाई गराएका थिए । “केन्द्रीय कमिटी बैठकका बेला म उपत्यका बाहिर थिएँ । बैठकमा उपस्थित हुन नसक्ने जानकारी गराएको थिएँ,” उनले बाह्रखरीसँग भने । 

बिदामा किन ? 
थापाले व्यक्तिगत काममा व्यस्त रहेकाले जिम्मेवारी नदिन आफैँले आग्रह गरेको बताए । “मैले बिदा लिएको हुँ ।  मेरो आफ्नै केही लेखनको काम छ । त्यो सक्दासम्म म पार्टीको कामम उपस्थित हुन्न भनेको छु,” उनले भने, “केही समय आफ्नै काम गर्न खोजेको हो ।”

उनले पार्टीको दशौं महाधिवेशनपछि भूमि व्यवस्था विभागमा जिम्मेवारी पाएका थिए । विभागको बैठकमा पनि आफू जान नभ्याएको उनले बताए ।