काठमाडौं । 'सिधा कुरा' मिडियाविरुद्धको अदालतको अवहेलना मुद्दामा फैसलाको मिति तोकिएको छ ।

सर्वोच्च अदालतका प्रधानन्यायाधीशको नेतृत्वमा गठित ९ सदस्यीय बृहत्‌पूर्ण इजलासले १५ दिनभित्र बहस नोट पेस गर्न आदेश जारी गर्दै भदौ ६ गतेलाई फैसलाको मिति तोकेको हो ।

'सिधा कुरा'ले ‘द डार्क फाइल’ नाम दिएर प्रसारण गरेको सामग्रीमा सर्वोच्च अदालतका न्यायाधीशसमेत संलग्न भएर भ्रष्टाचारका मुद्दा खारेज गर्ने सेटिङ गरेको दाबी गरिएको थियो । उक्त कार्यले अदालतको न्याय सम्पादनमा नै असर परेको भन्दै सर्वोच्चले सुमोटो लिएर मुद्दा चलाएको थियो । सिधा कुराविरुद्ध सर्वोच्च अदालतका उपरजिस्ट्रार गोविन्द घिमिरेले अदालतको अवहेला भएको दाबीसहित निवदेन दर्ता गरेका थिए ।

सर्वोच्चकै आदेशमा सिधा कुरामा प्रसारित सामग्रीमा प्रयोग भएको अडियो फरेन्सिक परीक्षणबाट फेक प्रमाणित भइसकेको छ ।

सिधा कुरा, त्यसका सञ्चालक युवराज कँडेल र कार्यकारी सम्पादक नवीन ढुंगानासहितलाई विपक्षी बनाइएको मुद्दामा बिहीबार नौजना न्यायाधीशको बृहत्‌पूर्ण इजलास सुनुवाइ भएको थियो । इजलासमा प्रधानन्यायाधीश विश्वम्भरप्रसाद श्रेष्ठ, न्यायाधीशहरू प्रकाशमान सिंह राउत, सपना प्रधान मल्ल, प्रकाशकुमार ढुंगाना, हरिप्रसाद फुँयाल, नहकुल सुवेदी, विनोद शर्मा, महेशशर्मा पौडेल र बालकृष्ण ढकाल छन् । 

पत्रकार महासंघले भने 'सिधा कुरा'ले गरेको गल्तीमा आमसञ्चार क्षेत्रको स्वतन्त्रता खुम्चिने र संविधानको प्रस्ताव‍नाको पूर्ण प्रेस स्वतन्त्रताको मर्म मर्ने गरी फैसला नगर्न ध्यानाकर्षण गराएको छ ।