काठमाडौं । यातायात व्यवस्था विभागको विद्युतीय लाइसेन्स प्रणालीको सर्भरमा समस्या आएको छ । गत सातादेखि नै विभागको सर्भरमा समस्या आउँदा देशभरका यातायात कार्यालयहरूमा सेवाग्राहीले लाइसेन्ससम्बन्धी सेवा पाउन समस्या भोगिरहेका छन् ।

मंगलबार पनि सर्भरमा समस्या देखिएको विभागले जनाएको छ । सर्भर भएको कोठामा तारहरू पग्लिएको र चिस्यानका लागि प्रयोग भएको एसी बिग्रिएको हुन सक्ने ठानिएको छ ।

समस्या समाधानका लागि काम भइरहेको र समाधान भएमा भोलि (बुधबार) सेवा प्रभावित नहुने विभागका महानिर्देशक उद्धवप्रसाद रिजालले बताए ।

"आजै राति समस्या समाधान गर्ने गरी काम भइरहेको छ । समाधान भयो भने भोलि सेवा जारी रहन्छ," उनले बाह्रखरीसँग भने ।

विभागले सञ्चालनमा राखेको विद्युतीय प्रणाली पुरानो भएको र निरन्तर मर्मतसम्भार नहुँदा समस्या आउन थालेको अधिकारीहरूको भनाइ छ ।

विद्युतीय लाइसेन्सका लागि प्रयोगमा रहेको सफ्टवेयर पनि सुस्त रहेको तर अहिले सर्भरमा समस्या आउँदा सेवा रोकिने स्थिति बनेको विभागले जनाएको छ ।