आज बुधवार बिहान  ११ बजेतिर काठमाडौंबाट पोखराका लागि उँडेको सौर्य एयरलाइन्सको विमान उड्नेबित्तिकै दुर्घटनाग्रस्त भयो । दुर्घटना भएको विमानमा सवार १९ जनामध्ये चालक १ जनाबाहेक सबैको मृत्यु भयो । सबै यात्रु सौर्य एयरलाइन्सकै कर्मचारी भएको जानकारी विमानसेवाले दिएको छ । 

विमान दुर्घटनापछि प्रधानमन्त्रीलगायत दुर्घटनास्थल पुगेका छन् । सञ्चार माध्यम र सामाजिक सञ्जालमा पनि विमान दुर्घटनाकै समाचार व्याप्त भएको छ । हवाई दुर्घटनाको समाचार संसारभर छिटै फैलिन्छ । यसैले अब केही दिन नेपाल फेरि विश्वका सञ्चार माध्यममा चर्चामा रहनेछ । 

सरकारले यसको जाँच गराउनेछ र प्रतिवेदन बुझ्नेछ । अनि अर्को दुर्घटना नहुँदासम्म सबैले  पीडितका आफन्तबाहेक अरूले बिर्सनेछन् । अहिलेसम्म भइआएको यही हो ।  हवाई दुर्घटना रोक्न अपनाउनुपर्ने सुरक्षा सावधानीमा सम्झौता गरिँदा नै यस्ता भयावह घटना हुनेगरेका न हुन् । 

गत माघ १ गते पोखरामा भएको यती एयरलाइन्सको विमान दुर्घटनाजस्ता केही घटनाबाहेक प्रायः दुर्घटना प्राविधिक त्रुटिका कारण हुनेगरेका छन् । विशेषगरी उडानका लागि उपयुक्त नभएका जहाजमासमेत यात्रु उडाउने गरिएकाले यस्ता दुर्घटना नियति नै बन्ने पुगेको हुन् विज्ञहरूले भन्दै आएका छन् । 

दुर्घटना हुनेबित्तिकै सरकारी अधिकारीहरूले देखाउने तदारुकता र गम्भीरता आफ्नो नियमित कामकाजमा पनि देखाएका भए सम्भवतः यस्ता भयावह दुर्घटनामध्ये धेरै हुने नै थिएनन् । कम्तीमा विमानको भौतिक अवस्थाको मापदण्डअनुरूप परीक्षण हुने हो भने पनि यस्ता भयावह दुर्घटनाहरू कम हुनेथिए ।

यही दुर्घटनाग्रस्त जहाजमा सौर्य एयरलाइन्सका कर्मचारीमात्र रहेको बताइएको थियो तर एक जना नाबालकसमेत यात्रुमा रहेका र उनको मृत्यु भएको छ । यस्तो गम्भीर हेलचेक्र्याइँ कोबाट भएको हो रु हेलचेक्य्राइँ सम्भवतः नेपालका वायुसेवा कम्पनीहरू र सरकारको पनि साझा प्रवृत्ति हो ।   

अब सरकारले गम्भीरतापूर्वक लिएर विमानस्थल र जहाजको भौतिक अवस्था तथा चालक दलको शारीरिक एवं मानसिक स्वास्थ्यको अन्तर्राष्ट्रिय मापदण्डअनुरूप नियमित जाँच र अनुगमन हुने प्रबन्ध मिलाउनुपर्छ । यस्तो प्रबन्ध पनि कागज मिलाएर झारा टार्ने प्रकृतिकै भइरह्यो र अर्को दुर्घटना भयो भने त्यसको दोष अहिलेको सरकारलाई लाग्छ ।

विमान दुर्घटनामा जीवन गुमाउनेहरूप्रति श्रद्धाञ्जलि प्रकट गर्दै शोकसन्तप्त परिवारजनलाई धैर्य धारण गर्ने शक्ति मिलोस् भन्ने कामना गर्छौँ । जीवितै उद्धार गरिएका चालकलाई स्वास्थ्य लाभको पनि कामना छ । यस्ता दुर्घटना दोहोरिन नदिने राज्यको दायित्व पूरा गर्ने मति प्रधानमन्त्रीलगायत सरकारका सबै अधिकारीमा पलाओस् !