![नवगठित सरकारको सोच र दृष्टिकोण कार्यान्वयन गर्न बजेट बाधक बन्दैन : अर्थमन्त्री](https://12khari.top/uploads/posts/bishnu-poudel6-1721035371.jpg)
काठमाडौं । नवनियुक्त उपप्रधान एवं अर्थमन्त्री विष्णुप्रसाद पौडेलले नवगठित सरकारको सोच र दृष्टिकोण कार्यान्वयन गर्न अघिल्लो सरकारले ल्याएको बजेट बाधक नबन्ने बताएका छन् ।
सोमबार राष्ट्रपतिको कार्यालयमा शपथग्रहणपछि सिंहदरबारस्थित अर्थ मन्त्रालय पुगेर पदभार ग्रहण गर्दै उनले नवगठित सरकारले तय गर्ने कार्यदिशालाई आउँदो आर्थिक वर्षको बजेटले समस्या नपार्ने विश्वास व्यक्त गरे । उनले बजेट कार्यान्वयनमा कुनै समस्या देखिए त्यसलाई प्रक्रियागत रूपमा संशोधन गर्न सकिने बताए ।
“सरकारको सोच र दृष्टिकोण कार्यान्वयन गर्न बजेट बाधक बन्दैन । यदि, बाधा देखियो भने कसरी फुकाउने भनेर कानुनी र संवैधानिक व्यवस्था छन्, सोहीअनुसार संशोधन प्रक्रियामा जान्छौँ,” अर्थमन्त्री पौडेलले भने ।
संसद्का दुई ठूला दलसहितको संयुक्त सरकारसँगै राजनीतिक स्थिरताको सन्देश दिइएको उनले उल्लेख गरे । उनले नयाँ सरकार गठनसँगै मुलुकको अर्थतन्त्रमा देखिएका समस्या समाधान हुँदै जाने विश्वास व्यक्त गरे ।
“अहिलेको निराशा चिर्ने र आशा जगाउने गरी सरकार अगाडि बढ्छ । उत्पादन र रोजगारीमा केन्द्रित भएर अघि बढ्नेछौँ । यसका लागि सबै क्षेत्रले परिवर्तित सन्दर्भमा सहयोग गर्ने अपेक्षा गरेको छु,” उनले भने, “सेयर बजार अर्थतन्त्रको ऐनाका रूपमा रहेकाले यो क्षेत्र सन्तुलित ढंगले अघि बढोस् भन्ने चाहना छ ।”
अर्थमन्त्रीका रूपमा जिम्मेवारी सम्हालेसँगै पौडेलले विकास वित्तका क्षेत्र पहिचानका निम्ति अध्ययन गरिनेसम्बन्धी पहिलो निर्णय गरेका छन् ।
मन्त्री पौडेलको उपप्रधानमन्त्रीका रूपमा यो तेस्रो र अर्थमन्त्रीका हिसाबले चौथो कार्यकाल हो । उनी प्रतिनिधिसभा निर्वाचन, २०७९ मा रुपन्देही निर्वाचन क्षेत्र नम्बर–२ बाट प्रत्यक्षतर्फ निर्वाचित भएका थिए ।
वि.सं. २०५१ मा पहिलोपटक सांसद बनेका पौडेल ०६४ र ०७० मा संविधानसभा सदस्य थिए । उनले संविधान अभिलेख, अध्ययन तथा निर्क्योल समितिको सभापति (२०७०)का रूपमा काम गरेका थिए ।
नवनियुक्त अर्थमन्त्री पौडेलले यसअघि ०५३ मा युवा, खेलकुद तथा संस्कृतिमन्त्री, ०६५ मा जलस्रोतमन्त्री र ०६७ मा रक्षामन्त्रीका रूपमा काम गरिसकेका छन् ।
उपप्रधान एवं अर्थमन्त्री पौडेलले ०३५ देखि ०४६ सालसम्म भूमिगत जीवन बिताएका थिए । ०३७ सालमा तीन वर्ष जेल र तीन हजार रुपैयाँ जरिवाना सजाय गरिएकामा उनले ४५ दिनमा जेल विद्रोह गरेका थिए । नेपाल कम्युनिस्ट पार्टी (एमाले)को प्रभावशाली नेताका रूपमा परिचित उपप्रधानमन्त्री पौडेल चार दशकदेखि राजनीतिमा सक्रिय छन् । उनी अहिले एमाले उपाध्यक्षको जिम्मेवारीमा छन् ।
उनी अखिल नेपाल कम्युनिस्ट क्रान्तिकारी कोओर्डिनेसन कमिटी (माले)को सदस्य भएर ०३५ साल असोजमा राजनीतिमा प्रवेश गरेका थिए । मन्त्री पौडेलले ०३५ मंसिरदेखि पूर्णकालीन सदस्य भएर त्यसमा काम गरेका थिए ।
०४१ मा नेकपा (माले)को जिल्ला कमिटी सचिव, ०४७ मा नेकपा (एमाले)को केन्द्रीय कमिटी सदस्य र ०५९ मा एमाले स्थायी कमिटी सदस्य भएर उनले काम गरिसकेका छन् ।
०६५ मा एमाले सचिव, ०७१ मा नवौँ महाधिवेशनपछि एमाले उपमहासचिव र ०७५ सालमा एमाले महासचिवको जिम्मेवारी लिएर उनले काम गरेका थिए ।
वि.सं. २०१६ मंसिर १६ गते स्याङ्जामा जन्मिएका नवनियुक्त अर्थमन्त्री पौडेलको स्थायी ठेगाना रुपन्देहीको बुटवल उपमहानगरपालिका–८ हो । हाल उनी ललितपुरमा बस्दै आएका छन् । रासस