![सेमिफाइनलबाट बाहिरिएपछि भारको निर्णयप्रति डच प्रशिक्षक आक्रोशित](https://12khari.top/uploads/posts/449083717_445573295033997_1636655014119346531_n-1720700392.jpg)
काठमाडौं । नेदरल्यान्ड्सका प्रशिक्षक रोनाल्ड कोम्यानले ‘फुटबललाई टुक्राएको’ भन्दै भिडियो असिस्टेन्ट रेफ्री (भार)को निर्णयप्रति आक्रोश पोखेका छन् । युरो–२०२४ को सेमिफाइनलमा बुधबार इंग्ल्यान्डसंग २–१ ले पराजित हुँदै प्रतियोगिताबाट बाहिरिएपछि कोम्यान भारको निर्णयप्रति आक्रोशित बनेका हुन् ।
जर्मनीको डर्टमन्डमा भएको खेलमा जाभी सिमोन्सको शक्तिशाली प्रहारबाट डच टिमले सुरुआती मिनेटमै अग्रता बनाएको थियो । तर, ह्यारी केनले प्राप्त पेनाल्टीलाई सदुपयोग गरेपछि ग्यारेथ साउथगेटको टोली खेलमा फर्किएको थियो । डेन्जेल डम्फ्रिजले पेनाल्टी क्षेत्रमा केनमाथि नै फाउल गरेपछि इंग्लिस टिमले भारको सहयोगमा पेनाल्टी पाएको थियो ।
रेफ्री फेलिक्स ज्वायरले पहिले फाउलको निर्णय नगरे पनि इंग्ल्यान्डले भारबाट पेनाल्टी पाएको थियो । जसमा केनले कुनै गल्ती नगरी बललाई जालीको दिशा दिए । ९०औँ मिनेटमा ओले वान्ट्किन्सले निर्णायक गोल गरेपछि इंग्ल्यान्ड लगातार दोस्रोपटक युरोपियन च्याम्पियनसिपको फाइनलमा प्रवेश गरेको हो ।
“मेरो विचारमा यो पेनाल्टी हुनुपर्ने थिएन । उसले बल प्रहार गरेको थियो र बुटमा छोइएको थियो । हामीले भारको कारण राम्रोसँग खेल्न सकेनौँ । यसले साँच्चै फुटबललाई टुक्राएको छ,” खेलपछि नेदरल्यान्ड्सका प्रशिक्षक कोम्यानले आक्रोस पोखे ।
इंग्ल्यान्डका पूर्वरक्षक तथा टेलिभिजन प्रस्तोता ग्यारी नेभिलले पनि नेदरल्यान्ड्ससँग आक्रोशित हुने पूर्ण अधिकार रहेको बताए । “एक रक्षकको रूपमा यो पक्कै पनि निकै अनुचित निर्णय थियो,” नेभिलले भने, “त्यहाँ पेनाल्टी हुनुपर्ने कुनै आधार थिएनन् । उनी प्राकृतिक रूपमै प्रहारलाई छेक्न गएका थिए । मेरो लागि त्यो पेनाल्टी थिएन ।”
नेदरल्यान्ड्सका कप्तान भर्जिल भान डाइकले पनि पेनाल्टीको निर्णयप्रति असन्तुष्टि पोखे । “मलाई लाग्छ पेनाल्टीको उक्त क्षण खेलकै महत्त्वपूर्ण थियो । त्यसबाट इंग्ल्यान्डले आत्मविश्वास पायो । खेलमा धेरै निर्णय हाम्रो पक्षमा रहेन । तर, म रेफ्रीबारे बोल्न चाहन्न,” भान डाइकले भने । लगातार दोस्रो पटक युरोपियन च्याम्पियनसिपको फाइनलमा स्थान बनाएको इंग्ल्यान्ड अब उपाधिका लागि स्पेनसँग खेल्ने छ ।