कठमाडौं । एक्सप्रेस–टी विद्युतिय ट्याक्सीको बालकुमारीस्थित सर्भिस सेन्टरले १५ घण्टा सेवा दिने भएको छ । सर्भिस सेन्टर अब बिहान ६ः३० देखि राति ९ः३० बजेसम्म खुला रहने भएको हो ।

एक्सप्रेस–टी विद्युतीय ट्याक्सीको सर्भिसिङ तथा चार्जिङ सुविधासहितको सर्भिस सेन्टरमा थप कार्यावधिमार्फत ग्राहक सेवालाई परिष्कृत पारिएको कम्पनीले जनाएको छ ।

कम्पनीले बालकुमारीस्थित एक्सप्रेस–टीको थ्री एस शो रुमबाट सेल्स, स्पेयर र सर्भिस सेवा उपलब्ध रहेको जनाएको छ ।

नयाँ प्रविधिका साथ आकर्षक तथा सुरक्षित बनावट, पर्याप्त ठाउँ भएको ठूलो गाडी, सामान राख्न पर्याप्त बुट स्पेसले गर्दा यो विद्युतीय ट्याक्सी धेरैको रोजाइमा परेको कम्पनीको जिकिर छ ।

एक्सप्रेस–टीमा एक वर्षको गाडीको बिमा, तीन वर्षसम्मको निःशुल्क सर्भिसिङ, एक लाख ६० हजार किमिसम्मको ब्याट्री र मोटरमा वारेन्टी छ ।

बालकुमारीका साथै भक्तपुर, गोंगबु र कपनमा पनि एक्सप्रेस–टीका निम्ति फास्ट चार्जरको व्यवस्था छ । चाँडै खाँडीचौर र कटारीमा पनि ट्याक्सीका लागि फास्ट चार्जर राख्ने कम्पनीले जनाएको छ ।