काठमाडौं । टाइब्रेकरमा ब्राजिलविरुद्ध ४–२ को जित निकाल्दै उरुग्वे कोपा अमेरिका–२०२४ को सेमिफाइनलमा प्रवेश गरेको छ । आइतबार बिहान अमेरिकाको एलेजियन्ट रंगशालामा भएको खेल गोलरहित बराबरीमा समाप्त भएपछि नतिजाको निर्णय पेनाल्टी सुटआउटबाट लिइएको हो । 

पेनाल्टीमा ब्राजिलबाट प्रहारका लागि आएका चार खेलाडीमध्ये दुई खेलाडी मात्र गोल गर्न सफल बने । ब्राजिलका एड्रियस पेरेरा र ग्याब्रियल मार्टिनेलीको प्रहार गोल भएको थियो । इडर मिलिटाओको प्रहारलाई उरुग्वेका गोलकिपरले विफल बनाउँदा डग्लास लुइसको प्रहार भने पोस्टमा लागेर फर्किएको थियो । 

उरुग्वेका पाँच खेलाडीमध्ये चार खेलाडी गोल गर्न सफल रहे । उरुग्वेका फेडेरिको भाल्भार्डे, रोड्रिगो बेन्टानकुर, जर्जियन डेम अरास्काइटा र म्यानुअल उगार्टेले गोल गरे । 

जोजे मारिया गिमेनेजको प्रहार ब्राजिलका गोलकिपरले बचाए पनि टिमको लागि पर्याप्त बन्न सकेन । जितसँगै १५ पटकको च्याम्पियन उरुग्वेले अब फाइनल प्रवेशका लागि कोलम्बियाविरुद्ध खेल्नेछ । 

सन् २०११ को संस्करण जितेयता उरुग्वे पहिलोपटक प्रतियोगिताको सेमिफाइनलमा प्रवेश गरेको हो । अर्जेन्टिनामा भएको उक्त संस्करणको फाइनलमा पराग्वेविरुद्ध ३–० को जितसहित उरुग्वे च्याम्पियन बनेको थियो । प्रतियोगिताको इतिहासमा हालसम्म उरुग्वेले १५ पटक उपाधि जितेको छ ।