![एमालेले भन्यो– प्रधानमन्त्रीज्यू, राजीनामा दिएर सहयोग गर्नूस्](https://12khari.top/uploads/posts/UML-Sachibalaya-1719926106.jpg)
काठमाडौं । नेकपा (एमाले)ले प्रधानमन्त्री पुष्पकमल दाहाल प्रचण्डलाई राजीनामा दिएर मार्गप्रशस्त गर्न आग्रह गरेको छ । एमालेको सचिवालय बैठकले यस्तो निर्णय गरेको नेता प्रदिप ज्ञवालीले जानकारी दिए ।
“कांग्रेस र एमालेको बीचमा मात्रै भएको समझदारी छ । ओलीको नेतृत्वमा राष्ट्रिय सहमतिको सरकार बनाउने सहमतिलाई स्वागत गर्ने निर्णय गरेको छ,” उनले भने, “सहमतिको सरकारमा सहभागी हुन राजनीतिक स्थायित्वमा सहयोग गर्न सबै राजनीतिक दललाई आह्वान गरिएको छ । त्यसका लागि प्रधानमन्त्रीलाई मार्गप्रशस्त गर्न आग्रह गर्ने निर्णय गरेको छ ।”
यसैबीच, एमालेले प्रधानमन्त्री प्रचण्डले वैकल्पिक सरकारको बहस चलाएकाले सहकार्य छाडेको तर्क गरेको छ । सचिवालय बैठकपछि सञ्चारकर्मीहरूको प्रश्नमा नेता ज्ञवालीले सत्ता साझेदार दललाई कुनै जानकारी नदिएर प्रचण्डले वैकल्पिक सरकारको बहस चलाएको बताए ।
"बहालवाला प्रधानमन्त्री स्वयंले वैकल्पिक सरकारकाे बहस चलाउनुभयाे, सत्तारूढसँग छलफल नगरी । प्रमुख पिपक्षीबाट प्रस्ताव भयाे भनी थाहा पाउनुपर्यो," ज्ञवालीले भने ।
![Global Ime bank](https://baahrakhari.com/uploads/bigyaapan/30885600.gif)
उनले गत फागुन २१ गते प्रचण्डलाई प्रधानमन्त्री बनाउँदा एमालेले ब्ल्याङ्क चेकमा सही गरेजस्तो गरी सहयोग गरेको पनि बताए ।
"उहाँले अहिलेसम्म एमालेजस्तो रचनात्मक सहयाेगी पाउनुभएकाे थिएन हाेला । नीति कार्यक्रम, बजेटले रिजर्भेसन भए नि पास गर्यौँ," उनले भने ।