काठमाडौं । समूह चरणको आफ्नो अन्तिम खेलमा पेरुविरुद्ध २–० को जित निकालेसँगै अर्जेन्टिना शतप्रतिशत नतिजासहित कोपा अमेरिका–२०२४ को क्वार्टरफाइनलमा प्रवेश गरेको छ ।

आइतबार बिहान हार्ड रक रंगशालामा अर्जेन्टिनालाई जित दिलाउन दुवै गोल लौटारो मार्टिनेजले गरे । ६४ हजार ९७२ समर्थकमाझ मार्टिनेजले ४७औँ मिनेटमा गोल गर्दै अर्जेन्टिनालाई अग्रतामा राखेका थिए ।

यस्तै, खेलको निर्धारित समय सकिन चार मिनेट बाँकी रहँदा मार्टिनेजले नै गोल गरेपछि अर्जेन्टिनाले समूह चरणका सबै खेलमा जित पक्का गरेको हो । जारी प्रतियोगितामा मार्टिनेजको यो चौथो गोल हो । प्रतियोगिताको ‘गोल्डेन बुट’ दौडमा मार्टिनेज सबैभन्दा अघि छन् । पेरुविरुद्ध अर्जेन्टिनाका नियमित कप्तान लियोनल मेसी भने चोटका कारण टिममा थिएनन् ।

यस्तै, आइतबार बिहान नै भएको अर्को खेलमा चिलीलाई गोलरहित बराबरीमा रोक्दै क्यानडाले समूह ‘ए’ बाट प्रतियोगिताको नकआउट चरणमा स्थान बनाएको छ । प्रतियोगिताको समूह ‘ए’ बाट अर्जेन्टिनाले शीर्ष स्थान हाशिल गर्दा क्यानडा उपविजेताको रुपमा क्वार्टरफाइनल प्रवेश गरेको हो । यस्तै, यो समूहबाट दुई पटकको च्याम्पियन चिली र पेरु भने बाहिरिएका छन् । चिलीले सन् २०१५ र २०१६ मा लगातार कोपा अमेरिकाको उपाधि जितेको थियो ।