काठमाडौं । ‘राष्ट्रिय वृक्षारोपण दिवस २०८१’ को अवसरमा वातावरण संरक्षणतर्फ महत्त्वपूर्ण कदम चाल्ने उद्देश्यसहित ‘एक युवा, एक विरुवा’ अभियानको औपचारिक सुरुआत भएको छ ।  

नेपाल युवा परिषद्, एनसेल र संयुक्त राष्ट्रसंघीय खाद्य तथा कृषि संगठन (एफएओ) नेपालको संयुक्त आयोजनामा शुक्रबार सो अभियान सुरु भएको हो । नुवाकोटको विदुर नगरपालिकाबाट अभियानको सुरुआत भएको हो । 

गत जेठमा विश्व वातावरण दिवसको अवसरमा एनसेल र नेपाल युवा परिषद्ले सातै प्रदेशका ७७ वटै जिल्लामा सात हजार ७०० रुख वृक्षारोपण गर्न एक समझदारी पत्रमा हस्ताक्षर गरेका थिए । 

प्रतिनिधिसभाका उपसभामुख इन्दिरा राना मगरले विदुर नगरपालिकामा विरुवा रोपेर यो अभियानको उद्घाटन गरेकी हुन् । युवाहरूले राष्ट्रव्यापी पहलको ऐतिहासिक सुरुआत भएको र युवाहरूसँग उर्जा र बल भएको बताइन् । उपसभामुख रानाले भनिन्, “यस अभियानमा सहभागी हुने युवाहरू सकारात्मक परिवर्तनको लागि शक्तिको प्रमाण हुन् । विरुवा रोपेर हामीले हाम्रो वातावरणमा मात्र योगदान दिइरहेका छैनौँ, भावी पुस्ताका लागि उदाहरण पनि बन्नेछ ।” 

अभियान आगामी असार २१ गतेसम्म सञ्चालन हुनेछ । राष्ट्रिय वृक्षारोपण दिवस २०८१ को अवसरमा गरिएको अभियानअन्तर्गत देशभरका सात हजार ७०० युवाले हरियाली वातावरण प्रवर्द्धन र जलवायु कार्य प्रयासहरूमा योगदान गर्दै कुल सात हजार ७०० बिरुवा रोप्नेछन् । यस अभियानका लागि एनसेलले आफ्नो व्यावसायिक सामाजिक जिम्मेवारी (सीएसआर)को एटिन फर एटिन कार्यक्रमअन्तर्गत नेपाल युवा परिषद्सँग सहकार्य गरेको छ ।   

दिवसको अवसरमा वातावरणको क्षेत्रमा यो उदाहरणीय सहकार्य र अभियानको सुरुआत भएको एनसेलकी कर्पोरेट कम्युनिकेशन एन्ड सीएसआर प्रमुख विशाखा लक्ष्मी खड्काले बताइन् । “यसले युवाहरूको सक्रिय सहभागितामा जलवायु परिवर्तनसँग लड्न र हरेक जिल्लामा हरियाली वृद्धि, वातावरण संरक्षण र दिगो विकास लक्ष्य प्राप्तिका लागि योगदान पु¥याउने हाम्रो विश्वास छ,” उनले भनिन् ।