काठामाडौं । नेकपा (क्रान्तिकारी माओवादी)का नेता सीपी गजुरेलले आफूहरू कम्युनिस्ट पार्टीबीच एकताको पक्षमा रहेको बताएका छन् । शनिबार काठमाडौंमा पुष्पलाल अध्ययन समाजले आयोजना गरेको एक कार्यक्रममा उनले यस्तो बताएका हुन् ।

कम्युनिस्ट पार्टीलाई मजबुत बनाउन पनि कम्युनिस्टबीचको एकता अनिवार्य रहेको उनले उल्लेख गरे । नेपालका कम्युनिस्ट पार्टीबीच एकताको विषय अहिले ‘हटकेक’ जस्तै भएको उनले बताए ।

उनले कम्युनिस्ट जनवादी गणतन्त्रका पक्षमा दृढतापूर्वक उभिनुपर्नेमा जोड दिए ।

उक्त कार्यक्रममा सीपी गजुरेलको भनाइ पढ्नोस्–
नेपालका कम्युनिस्ट पार्टी एकताको कुरा अहिले हटकेकजस्तै भएको छ । सबै नेताहरूले यो कुरा बोली हाल्नुहुन्छ– ल, हाम्रो पार्टीचाहिँ एकताको पक्षमा छ । सकेसम्म पार्टी एकता नै गर्ने, नभए पनि मोर्चा गर्ने । केही न केही त गरेरै छाड्छौँ भनी हाल्नुहुन्छ उहाँहरू । अहिलेको एउटा आवश्यकता के हो भने एउटा मजबुत क्रान्तिकारी कम्युनिस्ट पार्टी बन्नु अहिलेको इतिहासको आवश्यकता हो । नेपालमा अहिले जुन व्यवस्था आएको छ, लोकतान्त्रिक गणतन्त्र जुन आएको छ, त्यो हामीले मागेको हो कि परिस्थितिको उपज हो ? के त्यतिखेरको माओवादीले यही लोकतान्त्रिक गणतन्त्र ल्याउनका लागि जनयुद्ध गरेको हो त ? त्यो त होइन । एउटा त कम्युनिस्ट आन्दोलन कमजोर भएको छ, त्यसलाई बलियो बनाउनुपरेको छ । दोस्रो, अहिलेको आन्दोलनमा ठूलो भ्रम पैदा भएको छ । जनतमा भ्रम दिने दुईवटा विषय छन् – एउटा गणतन्त्र, अर्को समाजवाद । अब सबै पार्टीहरू के भन्छन् भने समाजवादको लागि अगाडि बढ्ने हो । अर्काे, सबैले गणतन्त्र भन्छन् । यो लोकप्रिय भएको छ । हाम्रो पार्टी असाध्यै कम्युनिस्ट एकताको पक्षमा छ । न्युज एजेन्सी नेपाल