काठमाडौं । राष्ट्रियसभामा नेपाली कांग्रेसकी सांसद दुर्गा गुरुङले संक्रमणकालीन न्यायलाई छिटो टुंगोमा पुर्‍याउन माग गरेकी छन् । 

राष्ट्रियसभाको बिहीवारको बैठकमा बोल्दै उनले २०६३ मंसिर ५ गते शान्ति सम्झौता भए पनि अहिलेसम्म संक्रमणकालीन न्यायलाई टुंगो लगाउन नसक्दा पीडितहरू झनै पीडित बनेको बताइन् । उनले पटक पटक आयोग बन्ने तर, द्वन्द्वपीडित र सत्य निरुपण गर्न नसकेको उल्लेख गरिन् । 

राजनीतिक दलहरूले विभिन्न मञ्चमा प्रतिबद्धता जनाए पनि अहिलेसम्म पूरा गर्न नसकेको जिकिर गरिन् । द्वन्द्वसँग सरोकार नराख्ने निःसशस्त्र व्यक्ति हत्या गरेको, बेपत्ता पारेका लगायतका पीडित परिवारलाई ‘तिम्रा परिवार गुमायौ अब बिर्सिदेउ र मेलमिलाप गर’ भन्ने जस्ता अभिव्यक्ति द्वन्द्वपीडितले सुन्नुपरेको बताइन् ।

सांसद गुरुङले द्वन्द्वपीडितको वर्गीकरण गर्न अति आवश्यक रहेको बताइन् ।