पोखरा । गण्डकी प्रदेशका सभामुख कृष्णप्रसाद धितालले सांसद फणिन्द्र देवकोटालाई प्रदेशसभा बैठकमा जान रोकेका छन् । सर्वोच्च अदालतले पद थमौती गरिदिएपछि पनि नेपाल समाजवादी पार्टी (नेसपा)का सांसद फणिन्द्र देवकोटालाई बिहीबारको प्रदेशसभा बैठकमा भाग लिन सभामुख धितालले रोकेका हुन् । 

माओवादी संसदीय दलको कारबाहीको आधारमा सभामुख धितालले गत जेठ ३२ गते देवकोटाको पद गएको पत्र प्रदेशसभामा वाचन गरेका थिए । त्यसको विरुद्ध देवकोटा सर्वोच्च पुगेका थिए । 

सर्वोच्चले गत सोमबार सभामुखले पद रिक्त भएको भनि प्रदेशसभामा वाचन गरेको निर्णय कार्यान्वयन नगर्न भन्दै देवकोटाको पद यथास्थितिमा रहने अन्तरिम आदेश गरेको थियो ।

सर्वोच्चले गत सोमबार सभामुखले पद रिक्त भएको भनि प्रदेशसभामा वाचन गरेको निर्णय कार्यान्वयन नगर्न भन्दै देवकोटाको पद यथास्थितिमा रहने अन्तरिम आदेश गरेको थियो ।

सर्वोच्चको आदेशपछि देवकोटा बिहीबारको प्रदेशसभा बैठकमा सहभागी हुन पुगेका थिए । तर, उनलाई सभामुखले बैठकमा सहभागी हुन दिएनन् । “म यही छु । भित्र बैठक चलिरहेको छ, म जान पाएको छैन, किन भन्ने जानकारी मलाई दिइएको छैन,” देवकोटाले भने ।

सर्वोच्च अदालतको पत्र आइसकेको अवस्थामा पनि उनलाई बैठकमा सहभागी हुन जाँदा मर्यादापालकले रोकेका हुन् । सचिवालय स्रोतका अनुसार सभामुख धितालले नै बैठकमा सहभागी नगराउनू भन्ने आदेशका कारण उनलाई रोकिएको हो ।

प्रदेशसभामा आजबाट बजेटको मन्त्रालयगत छलफल सुरु भएको छ ।