काठमाडौं । राष्ट्रिय स्वतन्त्र पार्टी (रास्वपा)का महामन्त्री मुकुल ढकालले प्रदेश संरचना खारेज गर्नुपर्ने निष्कर्षसहितको पार्टीको समीक्षा प्रतिवेदन सभापतिलाई बुझाएका छन् ।

महामन्त्री ढकालले देशभर पुगेर तयार पारेको समीक्षा प्रतिवेदन बुधबार राति पार्टी सभापति रवि लामिछानेलाई बुझाएका हुन् ।

उनले प्रतिवेदनमा नेकपा (एमाले) र नेकपा (माओवादी केन्द्र)सँग मिल्नुभन्दा स्वतन्त्र मेयरसँग मिल्दा फाइदा हुने उल्लेख गरेका छन् । जनताले रास्वपालाई प्रचण्ड–ओलीसँग भन्दा बालेन शाह, गोपी हमालसँग मिलेको देख्न चाहेको निष्कर्ष निकालेका छन् ।

"अहिलेको अवस्थामा ओली र प्रचण्डको साटो बालेन, गोपी हमाललगायत स्वतन्त्र पक्षधरका शक्तिहरूसँग हामी मिल्नका लागि सबैभन्दा उपयुक्त हुन्छ," उनले भने ।

उनको प्रतिवेदनमा पार्टीको लोकप्रियता घटेको निष्कर्ष निकालेको छ । "आकाशमा बादल मडारिएको छ । घण्टी कहिँ न कहिँ कालो देखिएको छ, घण्टी आफैँमा कालो छैन, घण्टी आज पनि निलो छ," उनले भने ।

उनले आफूलाई देशभरका जनताले पार्टी दुर्घटनातर्फ उन्मुख रहेको बताएको पनि उल्लेख गरे ।

"देशभरका जनताले पार्टी दुर्घटनातर्फ उन्मुख रहेको बताएका छन् । अब पार्टीमा निर्मम समीक्षा आवश्यक छ, धामी–झाँक्रीकहाँ होइन, अस्पताल लगेर उपचार गर्नुपर्ने बेला आयो," प्रतिवेदन बुझाएपछि सञ्चारमर्कीसँग ढकालले भने ।