काठमाडौं । नेपाल–चीन कूटनीतिक परामर्श संयन्त्रको १६औँ बैठक मंगलबार काठमाडौंमा सम्पन्न भएको छ ।

बैठकमा नेपाली प्रतिनिधिमण्डलको नेतृत्व परराष्ट्र सचिव सेवा लम्साल र चिनियाँ प्रतिनिधिमण्डलको नेतृत्व चीनका उपविदेशमन्त्री सुन वेइदोङले गरेका थिए । 

बैठकमा नेपाल र चीनबीचको द्विपक्षीय सम्बन्धका सबै पक्षको समीक्षा गरिएको थियो । साथै विगतमा भएका सम्झौता र समझदारीपत्रको कार्यान्वयनमा भएको प्रगति र विगतमा भएका निर्णयहरूको मूल्यांकन पनि बैठकमा गरिएको परराष्ट्र मन्त्रालयद्वारा मंगलबार जारी विज्ञप्तिमा उल्लेख छ ।

बैठकमा दुवै पक्षले आपसी सहमति भएका क्षेत्रमा सहयोगलाई थप प्रबर्धन गर्ने प्रतिबद्धता व्यक्त गरेका थिए । 

बैठकमा दुवै देशका प्रतिनिधिमण्डल प्रमुखले शान्तिपूर्ण सहअस्तित्वका पाँच सिद्धान्त, पञ्चशील, आपसी विश्वास, सद्भाव र समझदारीलाई नेपाल–चीन द्विपक्षीय सम्बन्धका प्रमुख विशेषताहरू रहेको प्रतिबद्धता दोहोर्‍याएका थिए ।

परराष्ट्र सचिव लम्सालले सन् २०२६ मा नेपाल एलडीसीबाट अपग्रेड भएपछि नेपालमा विकास सहयोग अभिवृद्धि गर्न चिनियाँ पक्षले गरेको प्रतिबद्धताका लागि समकक्षीलाई धन्यवाद दिएकी थिइन् ।

चिनियाँ उपविदेशमन्त्री वेइदोङले एक चीन सिद्धान्तप्रति नेपाल गर्दै आएको प्रतिबद्धताको प्रशंसा गरेका थिए । 

दुवै पक्षले उच्चस्तरीय भ्रमणको नियमित आदानप्रदानको परम्परालाई कायम राख्ने विषयमा सहमति जनाएका थिए । 

बैठकमा उनीहरूले सन् २०२५ मा चीनमा नेपाल भ्रमण वर्ष मनाउने सन्दर्भमा चीनमा नेपालको पर्यटन प्रबर्धनलगायत व्यापार, लगानी, पूर्वाधार विकास, कनेक्टिभिटी, कृषिलगायतका क्षेत्रमा सहयोग अभिवृद्धि गर्ने विषयमा छलफल भएको थियो ।

दुवै पक्षले सन् २०२५ मा नेपाल र चीनबीच कूटनीतिक सम्बन्ध स्थापना भएको ७०औँ वार्षिकोत्सव विशेष कार्यक्रम र गतिविधिका साथ मनाउने निर्णय गरेका छन् ।

बैठकमा दुवै पक्षले विद्यमान द्विपक्षीय संयन्त्रलाई थप सक्रिय बनाउन र परराष्ट्रमन्त्रीस्तरमा संयुक्त आयोगलगायत नयाँ संयन्त्र स्थापना गर्नुपर्नेमा जोड दिएका थिए ।

उपविदेशमन्त्री वेइदोङ र उनको प्रतिनिधिमण्डल सोमबार काठमाडौं आएको थियो । उनी बुधबार स्वदेश फर्कने कार्यक्रम छ ।